وزیراعظم محمد نواز شریف نا دفاعی نمائش”آئیڈیاز2016ئ“ نا افتتاحی دود آن تران
کراچی۔ 22نومبر (اے پی پی) وزیراعظم محمد نواز شریف پاکستان نا غٹ آن بھلا دفاعی نمائش”آئیڈیاز2016ئ“ نا افتتاح ئِ کرے۔ سے شنبے نا دے ایکسپو سینٹر کراچی ٹی پروقار افتتاحی دود اٹی بنجائی وزیر دفاعی پیداوار رانا تنویر، وزیراعلیٰ سندھ سید مراد علی شاہ ، وزیر دفاع خواجہ آصف، چیف آف دی آرمی اسٹاف جنرل راحیل شریف ، پاک بحریہ نا سروک ایڈمرل محمد ذکاءاللہ ، پاکستان ایئر فورس نا سروک ایئر چیف مارشل سہیل امان و ایلو بڑزکو شخصیت آک ہم ساڑی ئسر۔ افتتاحی دود آن تران کرسا وزیراعظم محمد نواز شریف نمائش اٹی ساڑی ڈل آتا خیرمقدم ئِ کرسا پارے کہ حکومت معیشت ئِ سوگو جوڑ کننگ کن پرعزم ئِ و ملک اٹی زرکاری کن سازگارچاگڑد و کٹیا کروک زرکاری کن بھلو وارخواہی اس ساڑی ارے وخت اس کہ پاکستان دفاعی صنعت نا شونداری کن ہم زرکاری کننگ ئِ۔ اوپارے کہ ملک اٹی سود انا کچ کم انگا کہول آٹی ئِ وخت اس کہ افراط زر ہم نمان کمتی و شرح نمو ٹی ودکی مسنے۔ وزیراعظم نمائش ئِ سرسہب جوڑ کننگ کن منتظمین آتا کوشت آتے ستاکڑزوک گوندسا پارے کہ آئیڈیا ز نمائش جہانی کہول آ تینا گچین ہند دوئی کرسا جہانی منڈی تیٹی پاکستانی دفاعی سلہہ غاک تینا لوہا ئِ منوائفینو۔ نمائش اٹی 2ہزار آن زیات حرب انا ازباب تخنگانے۔ اوپارے کہ ننا آلات حرب امن نا اڈتننگ کن ئُ۔ پاکستان ڈیہہ ٹی ہر وڑناسلہہ غاتا دوڑ انا برخلاف ئِ۔ اوپارے کہ ملک اٹی دہشت گردی نا واقعہ غاتیٹی صفا ئُ کمتی اس بسنے وزیراعظم پارے کہ اسٹیٹ بینک 16سال اٹی اولیکو وار کم کچ انا سود نا پڑو ئِ کرینے۔ اوپارے کہ جہانی ادارہ غاتیٹی پاکستان نا معیشت نا درجہ بندی نہ صرف گچین مسنے بلکن جہانی ادارہ غاک ہم پاکستانی معیشت نا گچینی نا معترف ئُ۔ وزیراعظم محمد نواز شریف پارے کہ حکومت راجی بشخ آتا گچینی آ خصوصی توجوہ تننگ ئِ و ملک اٹی توانائی نا تنکی ٹی نمان کمتی مسنے وخت اس کہ توانائی نا ڈٹ آتا بروخت پوروی کن ہم ہڑدڑی بنداوتیا کاریم مننگ ئِ۔ دود آن تران کرسا بنجائی وزیر دفاعی پیداوار رانا تنویر پارے کہ آئیڈیاز نا مسخت بیدادی نا چٹفنگ و امن ئِ مون آ دننگ نا ئِ، وزیراعظم نا سروکی ٹی دفاعی بشخ شونداری کرینے۔
