اسلام آباد۔ 21نومبر (اے پی پی) راولپنڈی، ملتان، کراچی ، حیدرآباد، کوئٹہ و پشاور تون اوار مچ آ ملک اٹ غٹ چنکا بھلا شارتیٹی کربلا نا شہید آتا چہلم شان و شرف اٹ اڈتننگانے۔ نجی ٹی وی چینل نا رداٹ دوشنبے آ ملک انا غٹ چنکا و بھلا شارتیٹی کربلا نا شہید آتا چہلم نا چرجوئی ٹی جلوس کشنگا۔ داوخت آ کیہی شار تیٹی موبائل فون سروس بند مس و تعلیمی ادارہ غاتے اسہ دے اکن بند کننگ نا پڑو کننگا۔ سیکورٹی بست و بند آتارداٹ کیہی شارتیٹی موٹرسائیکل نا ڈبل سواری آ ہم پابندی خلنگا۔ لاہور اٹی چہلم حضرت امام حسین و عرس داتا صاحب نا آخریکو دے انا سوب سیکورٹی نا سخت بست و بند کرسا شار اٹی جلوس نا کسر تیا 6ہزار پولیس کارندہ تعینات کننگ تون اوار سی ٹی وی کیمرہ غاتے اٹ چہلم نا جلوس نا مانیٹرنگ ، داتا دربار و کربلا گامے شاہ نا کنڈا ہنوک آ کسر تے ٹریفک کن بند کرسا بیئریئر و خاردارتارخلنگا و عذادارآتے کن گورنمنٹ سنٹرل ماڈل اسکول اٹی میڈیکل کیمپ اس ہم اڈتننگا۔ پشاور اٹی نواسہ رسول ﷺ و ایلو کربلا نا شہید آتا چہلم نا چرجوئی ٹی مجلس و ماتمی جلوس دوئی مس۔ امام بارگاہ علمدار اٹی پشتو مجلس اس اڈتننگا و علم غازی عباس نا جلوس دوئی مس۔ امام بارگاہ اخوند آباد آن ذوالجناح نا جلوس کشنگا ہرا روایتی کسرتیان گدرینگسا پدی ہندا امام بارگاہ غا چٹا۔ ملتان اٹی حضرت امام حسین رضی اللہ تعالیٰ عنہ نا چہلم بے کچ مذہبی جوش و جوزہ اٹ اڈتننگا، داوخت آ سیکورٹی نا فول پروف بست و بند کننگا۔ مچ آ ضلع ٹی چہلم نا بابت 23ہند آتیا مجلس اعزا اڈتننگا ہرافتے آن 8ئِ بے کچ حساس گوندنگا۔ ملتان اٹی اولیکو بنجائی جلوس عملدار چوک آن دوئی مس۔ کوئٹہ ٹی کربلا نا شہید آتا چہلم نا وخت آ شار اٹی سیکورٹی نا سخت بست و بند کننگا ، جلوس نا مقررہ کسرتے بند کننگا۔ شار اٹی کربلانا شہید آتا مناسبت آن سیکورٹی کن 3ہزار 5سد کارندہ تعینات کننگا ، جلوس نا مقررہ روٹ آ غٹ دکان تے بند کننگ نا پارت کننگا و روٹ اتون منسلک غٹ کسر تے خاردارتار، ٹرک آتے سلفسا بند کننگا۔
