بلوچستان مزن شاہ دربرجاھ بلوچستان ئِ راجی زبانی آنی دیمروئی ئِ ھاترا سک باز واھشت مند اِنتئُُ راجی زبان آنی واستہ جُتائیں اکیڈمک بلاک ئِ جوڑ کنگ ئِ کار سرجم بوتگ، ایشی ئِ تہئَ توامیں آسراتی اَست اَنت، بلوچستان یونیورسٹی ئِ وائس چانسلر ڈاکٹر جاوید اقبال
کوئٹہ۔19نومبر (اے پی پی) بلوچستان یونیورسٹی ئِ بلوچی شوبگ ئِ نیمگ ئَ چہ لائف ٹائم اچیومنٹ ایوارڈ ئِ درگت ئَ یک مراگش ئِ برجم دارگ بوت ایشی ئِ تہ ئَ ھاسیں مہمان ، وائس چانسلر ڈاکٹر جاوید اقبال اَت۔ دیوان ئِ تہ ئَ نامداریں ئُُ شاھکاریں ندکار منیر بادینی ، پٹ ئُُ پول کار ڈاکٹر عبدالصبور بلوچ، بلوچی شوبگ ئِ چیئرپرسن عبدالرحیم مہرئَ ھوار بازیں لبزانکی شاھکار ئُُ پٹ ئُُ پولکار ساڑی اَتاں ۔ ایشی ئَ ابید نودربر آنی مزنیں کساس ئِ ھم ساڑی اَت۔ بلوچی ادب ئِ ھاترا عبدالغنی پرواز ئِ چتگ ئُُ نز آرتگیں کتاب آنی سر ئَ چمشانک دیگ بوت، آئی ئِ ساچستی پڑ ئَ را ھم تران کنگ بوت، آئی ئِ بلوچی فیکشن ئِ سر ئَ نبشتگیں کتاب ئَ را ساڑاھگ بوت ئُُ گوشگ بوت کہ آئی ئِ اِزمی بالاد آنی سیم سر سک پراھ ئُُ شائیگان اَنت۔ اے درگت ئَ آرا بلوچی شوبگ ئِ نیمگ ئَ لائف ٹائم اچیومنٹ ایوارڈ ئِ داد دیگ بوت۔ وائس چانسلر جاوید اقبال ئَ گوشت کہ بلوچستان یونیورسٹی ادبی، راجدپتری، ئُُ زانشی ئُُ پٹ ئُُ پولکاری پڑ ئَ کتگیں ٹوھیں کارست آنی، آئی ئِ ازمکار ی ئِ درگت ئَ اے وڑیں ایوارڈ ئُُ داد دنت۔ آئی ئَ گوشت کہ اے شاھکارآنی کتگیں جُہد ئُُ کوشست ئِ سبب ئَ مئے دود ئُُ ربیدگ زبان مرچی راجدپترے تاک آنی دیم ئَ زندگ ئُُ نمیران اَنت۔ آئی ئَ گوشت کہ راجی زبان آنی ھاترا جتائیں اکیڈمک بلاک ئِ جوڑ کنگ ئِ کار سرجم بوتگئُُ ایشی ئِ تہ ئَ توامیں آسراتی پُجارینگ بوتگ اَنت۔ دیوان ئِ تہ ئَ منیر احمد بادینی، ڈاکٹر عبدالصبور بلوچ ئُُ ایندگہ ادبی شاھکار آں عبدالغنی پرواز ئِ ادبی اِزمت آنی سر ئَ چمشانک ھم دات۔
