اسلام آباد۔ 17نومبر (اے پی پی) بنجائی وزیر پارلیمانی امور شیخ آفتاب احمد پارینے کہ ترکی نا صدر رجب طیب اردوان نا سرسہب پاکستان نا دورہ غان ہڑتوم آملک آتا تعلقداری تیٹی پین گچینی بریک۔ ریڈیو پاکستان تون ہیت وگپ کرسا اوپارے کہ پاک ترک دوستانہ تعلقداری نا مریس تاریخ اسے و ترک صدر نا تاریخی دورہ پاکستان آن ہڑتوم آ ملک آتا تعلقداری تیٹی پین گچینی بریک۔ اوپارے کہ ہڑتوم آ ملک آتا الس ہم اسہ ایلو ئِ شرف نا نظراٹ ہریرہ و اسہ ایلو نا ملک ئِ تینا ارٹ میکو اُرا سرپند کیرہ۔ کشمیر نا ویل انا بارواٹی ترک صدر نا بیان نا بابت ہیت وگپ کرسا شیخ آفتاب احمد پارے کہ ترک صدر نا کنڈآن داویل ئِ اہمیت تننگ خوش آئند ئِ۔ اوپارے کہ ترک صدر خواہک کہ کشمیر نا ویل ئِ کشمیری تا است خواہی نا رداٹ ایسر کروئی مرے و اوفتے دا وارخواہی ئِ بایدے تننگے کہ او داہیت انا تینٹ فیصلہ ئِ کیرکہ اواوفتے دیر تون رہینگوئی ئِ۔ پاکستان و ترکی نا نیام اٹ کروک آ معاہدہ غاتا بابت چست کروک آ سوج انا ورندی ئِ ترسا اوپارے کہ ترک صدر نا ساڑی آ دورہ پاکستان نا نیام اٹ معاشی و دفاعی بشخ آتیٹی کمکاری نا کیہی معاہدہ کننگانے ہرافتے آن ہڑتوم آ ملک آک اسہ ایلو ناآزموندہ غاتیان مستفید مریرہ و واپاری و معاشی رابطہ غاک سوگو مریرہ۔
