اسلام آباد۔ 15نومبر (اے پی پی) وزیراعظم محمد نواز شریف داہیت آ زورشاغانے کہ اقوام متحدہ بھارت نا کنڈآن لین آف کنٹرول آ سیز فائر نا خلاف ورزی و بے چیٹی ٹی بے سوب ودکی نا نوٹس ئِ ہلے۔ پاکستان نا کنڈآن ضبط و تحمل نا درشانی ئِ نزوری تکنگپ، ہر بیدادی نا برخلاف تینا گل زمین نا دفاع نا پبی لائخی تخنہ۔ اوداہیت ئِ سے شنبے آ وزیراعظم ہاﺅس اٹی لین آف کنٹرول آ بگڑینگوک آ حالیت آتا بابت دیوان نا کماشی ئِ کرسا پارے۔ وزیراعظم نا سلاہکار خارجہ امور سرتاج عزیز وزیراعظم ئِ لین آف کنٹرول آ حالیت و ساڑی آ بے خار بھارتی سم کاری، ہراٹی بھمبر نا علاقہ ٹی ہفت پاکستانی سپاہی شہید مسر، آن گڈ حکومت نا ردعمل نا بارواٹی معلومدار کرے۔ وزیراعظم نا سلاہکار وزیراعظم ئِ بھارت نا کنڈآن شاری آبادی نا علاقہ غاتے ہدف جوڑ کرسا اندھا دھند سم کاری کننگ وگولہ باری نا ودوک آ واقعہ غاتا بارواٹی معلومدار کرے۔ اوپارے کہ بھارتی فوج انا کنڈآن سم کاری نا ساڑی آ واقعہ غاتیٹی 26شاری شہید و 107ٹھپی مسنو ہرافتے ٹی چناو نیاڑی ہم اوار ارے ہرا 2003 ءنا سیز فائر مفاہمت و بین الاقوامی کانود نا صریح خلاف ورزی ئِ۔ وزیراعظم محمد نواز شریف شہید آتا خاہوت آتون دلی ہمدردی ہڑزخواہی نا درشانی ئِ کرسا داہیت آ زورشاغا کہ پاکستان بھارتی بیدادی نا باوجود بے کچ ضبط نا درشانی ئِ کننگ ئِ ہرادے ننا نزوری سرپند کننگپ۔ اوپارے کہ پاکستان ئِ دُن انگا ہتھکنڈہ غاتیان مرعوب کننگ مفک و نن ہر بیدادی نا برخلاف تینا گل زمین نا دفاع نا پبی لائخی تخنہ ۔ وزیراعظم پارے کہ بھارتی فوج ناکنڈآن لین آف کنٹرول آ بے چیٹی ٹی دانستہ ودکی علاقائی امن و سلامتی کن خلیس اسے۔ اوپارے کہ دا بھارتی کمامدارآتا کنڈآن مقبوضہ کشمیر نا کودک و بے گناہ بندغ آتا برخلاف بدترین وڑنا بیدادی آن دنیا نا توجوہ ئِ اسہ کنڈ کننگ نا بے سہب کوشست اس ہم ارے۔ وزیراعظم زورشاغا کہ اقوام متحدہ ئِ لین آف کنٹرول آ سیز فائر نا خلاف ورزی و ہڑتوم آ ملک آتا نیام اٹ بے چیٹی ٹی بے سوب ودکی نا بایدے نوٹس ئِ ہلے۔ اوپارے کہ ننا سلہہ بند فوج فائر کننگ اٹی پہل کپک او ہر بیدادی نا ہمیشہ پبی ورندی ئِ ایتک۔ وزیراعظم ئِ امریکہ ٹی ساڑی آ صدارتی گچین کاری نا رداٹ پاک امریکہ تعلقداری نا بارواٹی ہم معلومدار کننگا۔ ہڑتوم آ کنڈآتا تعلقداری ئِ پین سوگوی تننگ نا عزم انا اعادہ ئِ کرسا وزیراعظم پارے کہ پاکستان و امریکہ نا نیام اٹ سوگو و سٹریٹجک شریداری 7دہائی تا مریس وخت آتیا محیط ئِ۔ اوپارے کہ پاکستان ڈیہہ و اوڑآن پیش امن، سلامتی و شونہالی نا دوئی کن پوسکن گچین مروک آ حکومت تون اواری اٹ کاریم کننگ نا خواہندار ئِ۔ قومی سلامتی سلاہکار لیفٹیننٹ جنرل (ر) ناصر خان جنجوعہ ، وزیراعظم نا خصوصی کمکار طارق فاطمی و ایلو سینئر کمامدارآک ہم دیوان اٹی ساڑی ئسر۔
