فاٹا نا 20ہزار استاد آتا اپ گریڈیشن اوفتا حق ئِ ، کیس وزارت خزانہ تون ئِ ، اپ گریڈیشن کن 9ارب روپئی درکار مریک، دا معاملہ ئِ زوت ایسر کننگک ریاستیں و سیمی معاملہ نا بنجائی وزیر لیفٹیننٹ جنرل (ر) عبدالقادر بلوچ نا ایوان بالا ٹی ورندی

اسلام آباد۔ 22اپریل (اے پی پی) ریاستیں و سیمی معاملہ نا بنجائی وزیر لیفٹیننٹ جنرل (ر) عبدالقادر بلوچ پارینے کہ فاٹا نا 20ہزار استاد آتا اپ گریڈیشن اوفتا حق ئِ ،ہرادے حکومت اوفتے ایتک ، دا کیس وزارت خزانہ تون ئِ انتئے کہ اپ گریڈیشن کن 9ارب روپئی درکار مریک۔ دامعاملہ ئِ زوت ایسر کننگک۔ جمعہ آ ایوان بالا نا دیوان اٹی بنجائی وزیر سیفران پارے کہ دا معاملہ درو ایوان اٹی چست کننگاسس۔ اوپارے کہ فاٹا نا 20ہزار استاد آتا اپ گریڈیشن اوفتا حق ئِ۔ دابابت آن مست ہم یخین دہانی کرفیسر۔ دروہم او استاد آتون ملاٹ اوفتا ہڑتال ئِ چٹفین۔ وزارت خزانہ تون دامعاملہ ئِ چست کننگانے اومیتئِ کہ اسہ ہفتہ سے ٹی دا معاملہ ئِ ایسر کننگک۔ استاد آتا اپ گریڈیشن نا منظوری زوت تننگک۔ فاٹا نا باسک سینیٹر اورنگزیب پارے کہ ننے تسلی بخش ورندی ملتو ہنداخاطران نن واک آﺅ ٹ کینہ۔ اوڑتون اوار ہی فاٹاآن تعلق تخوک آ باسک آک واک آﺅٹ کریر وخت اس کہ اپوزیشن جماعت آک ہم اوفتے تفیر۔ سینیٹر مولانا عطاءالرحمان ہم فاٹا نا استاد آتا خواست انا مخ تفی ئِ کریر ۔