اسلام آباد۔ 04اکتوبر (اے پی پی) قومی اسمبلی اقلیت آتیان تعلق تخوک آ نیاڑی تا مذہب ناجبراََ تبدیلی و اوفتے تون زوراکی برام نا بابت اسہ متفقہ قرارداد اسے نا منظوری ئِ تسنے۔ سے شنبے آ قومی اسمبلی ٹی لال چند ملہی قرارداد پیش کرے کہ ”داایوان نا رائے ئِ کہ حکومت اقلیت آتیان تعلق تخوک آ نیاڑی تا مذہب جبراََ تبدلی و جبری رشتہ ازدواج اٹی منسلک کننگ نا توننگ کن دمدستی گام گیج چست کے۔ “ لال چند ملہی پارے کہ پیپلز پارٹی و مسلم لیگ (ن) تینا گچین کاری منشور اٹی وعدہ کریسر کہ داڑآ کانود سازی کننگک ولے داوڑ متو ہنداخاطران قرارداد منظورکننگے۔ خواجہ سہیل منصور پارے کہ غیر مسلم پاکستانی تا داغاو درست ئِ ، غٹ مذہب آتا خلقت آتا حق انارکھ ئِ باوری جوڑ کننگے۔ پارلیمانی سیکرٹری خلیل جارج پارے کہ دابابت بل پیش مسنے۔ قرارداد نا گرج اف ۔ لال چند ملہی پارے کہ قرارداد حکومت نا برخلاف اف دا بایدے منظور مرے۔ ڈاکٹر عذرافضل پارے کہ قرارداد منظور کننگ اٹی ہچ ئُ حرج اس اف ، غیر مسلم پاکستانی تتون زیاتی نا بایدے ازالہ مرے۔ جمشید احمد دستی پارے کہ فاضل باسک ئِ پاروئی مرے کہ ہراجاگہ غا مذہب ئِ بدل کننگ کن واک انا استعمال مسنے یا جبرکننگانے۔ تبلیغ مسلمان تاحق ئِ، فاضل باسک ثبوت ایتے و سیاسی پوائنٹ سکورنگ کننگپ۔ خلیل جارج پارے کہ نن اونا مخالفت ئِ کپنہ دادے ہم کمیٹی نا حوالہ کننگے۔ ڈاکٹر نفیسہ شاہ پارے کہ قرارداد نامتن بے کچ سادہ ئِ داڑآ بایدے گڑتی مرے۔ بنجائی وزیر زاہد حامد پارے کہ حکومت داڑآ کانود اس اتنگ خواہک، ننے قرارداد منظور کننگ آ ہچ ئُ اعتراض اس اف۔ ڈاکٹر درشن پارے کہ قرارداد منظور کننگ اٹی ہچ ئُ حرج اس مفک۔ شیر اکبر خان پارے کہ قرارداد ئِ منظور کننگے۔ ڈپٹی اسپیکر قرارداد ئِ ایوان اٹی منظوری کن پیش کرے ہرادے متفقہ وڑاٹ منظور کننگا۔
