اسلام آباد نا شاریک پنجاب نا 50درسد کوٹہ نا رداٹ درخواست تننگ کیرہ، زاہد حامد
اسلام آباد۔ 04اکتوبر (اے پی پی) بنجائی سرکاری ملازمت آتیٹی اسلام آباد نا ڈومیسائل تخوک آتے کن جتا کوٹہ اس جتا کننگ نا گام گیج چست کننگ نا بابت پی ٹی آئی نا کنڈآن قومی اسمبلی ٹی پیش کروک قرارداد پین غور اکن تعلقدارقائمہ کمیٹی نا حوالہ کننگا۔ سے شنبے آ قومی اسمبلی ٹی پی ٹی آئی نا باسک اسد عمر قرارداد پیش کرے کہ داایوان نا سلاہ ئِ کہ بنجائی سرکاری ملازمت آتیٹی اسلام آباد ناڈومیسائل تخوک آتے کن جتا کوٹہ اس مختص کننگ نا رداٹ گام گیج چست کننگے۔ اسد عمر پارے کہ اسلام آباد نا شاری تے او حق دوئی اف ہرا صوبہ غاتا الس آتے دوئی ئِ۔ مچ آ ملک اٹی تعیناتیک کوٹہ نا بناءغا آخا بلکن میرٹ آ بایدے مریر اگہ ایلو صوبہ غاتیٹی دا نظام رائج ئِ تو اسلام آباد نا شاری تے ہم دا حق بایدے ملے۔ بنجائی وزیر شیخ آفتاب احمد پارے کہ اسلام آباد نا آبادی ایلو صوبہ غاتا مقابلہ ٹی کم ئِ۔ اگہ اسلام آباد کن کوٹہ اس جتا کننگاتو اسلام آباد نا شاری تے نسخان مریک۔ بنجائی وزیر زاہد حامد پارے کہ کوٹہ نا بابت بل تیار ئِ و ہندا ہفتہ ایوان اٹی اودے پیش کروئی ئس، اسلام آباد نا شاری تا شمار پنجاب ناکوٹہ ٹی اوارے۔ اگہ جتا کینہ تو شاری تا نسخان مریک۔ اوپارے کہ مردم شماری ئِ ہم مروئی ئِ، جوان ئِ کہ مردم شماری آن گڈ فیصلہ اس کننگے۔ ڈاکٹر عذرا افضل پیچوہو پارے کہ پنجا درسد کوٹہ پنجاب تون ئِ۔ اگہ اسلام آباد نا شاری اس ملازمت کن درخواست تفک تو کل تا صوبہ تون کارہ۔ دا ایلو صوبہ غاتون ہم زیاتی اسے۔ اسلام آباد کن جتا کوٹہ اس مختص بایدے مرے۔ ڈاکٹر شیریں مزاری پارے کہ اسلام آباد تون امتیازی برتاﺅ بایدے مف۔ اسلام آباد نا خلقت آتے کن جتا کوٹہ اس مختص بایدے مرے۔ اسلام آباد کن نیاڑی تاجتا نشست اس بایدے مختص مرے۔ صاحبزادہ طارق اللہ ہم اسد عمر نا قرارداد نا مخ تفی ئِ کرے و پارے کہ اسلام آباد نا جتا حیثیت اسے۔ اوپارے کہ بھرتی تا بابت اسلام آباد کن خصوصی گام گیج چست کروئی مرے۔ حاجی غلام احمد بلور پارے کہ پنجاب ئِ تینا کوٹہ غان اسلام آباد ئِ گڑاس بشخ تروئی مرے۔ محمودخان اچکزئی پارے کہ دامعاملہ غا آئینی چاہندار آتا سلاہ ئِ ہلنگے و صوبہ غاتے ہم دا صلابت اٹی اوار کرسا فیصلہ اس کننگے۔ عبدالوسیم پارے کہ ہراہم حکومت بریک او تینا بندغ آتے نوکری ایتک۔میرٹ ئِ معیار جوڑ کننگے۔ عارفہ خالد پارے کہ اسلام آباد آ غٹ صوبہ غاتا حق ئِ ۔ غٹ صوبہ غاتے زرس زرس بشخ شاغوئی مرے۔ نعیمہ کشور خان پارے کہ اسلام آباد اٹی غٹ صوبہ غاتا بندغ آک رہینگرہ۔ کوٹہ جتا کننگ آن جوانی آن بیدس منفی زئم مرتب مریک۔ اول منظور مروک آ قرارداد آتیا عملدرآمد نا حالیت آتا بارواٹی ہم پاننگے۔ علی محمد خان پارے کہ اگہ نن تینا خلقت آتے باوقار جوڑ کروئی ئِ تو اوفتے خودکفیل جوڑ کروئی مریک۔ اسد عمر پارے کہ او اسہ پوسکن ئُ کوٹہ سسٹم اس الاٹ کننگ نا ہیت ئِ کتنے۔ غٹ صوبہ غاتا ملازمت آتیٹی بشخ ارے، اسلام آباد کن جتا بشخ اس اف۔ اسلام آباد نا ورناتا دا دیرینہ خواست ئِ۔ اوپارے کہ پنجاب سروس کمیشن اٹی اسلام آباد نا نمائندگی ہم اف۔ وونٹ آتا تناسب آن ہم دا ویل ئِ ایسر کننگ مریک۔ مردم شماری نا انتظار ئِ کننگپ۔ منطقی ہیت دادے کہ اسلام آباد ئِ پنجاب نا کوٹہ آن حق بایدے ملے۔ اسلام آباد نا الس نا حق اکن پین ہچ ئُ فارم اس اف۔ بنجائی وزیر کانود زاہد حامد آئین نا آرٹیکل (1)27نا حوالہ ئِ ترسا پارے کہ بنداوی اصول تو دادے کہ تقرریک میرٹ آ مریر ، 2007 ءآن داکوٹہ سسٹم بننگ ئِ۔ اسلام آبا د نا شاریک پنجاب نا 50درسد کوٹہ نا رداٹ درخواست تننگ کیرہ۔ اگہ کوٹہ اس جتا کننگاتو دا اوفتے تون زیاتی مریک۔ جوان ئِ کہ کمیٹی اس اڈترسا فیصلہ کننگے و دامعاملہ ئِ کابینہ کمیٹی ناحوالہ کننگے۔ اسپیکر قرارداد کابینہ سیکرٹریٹ نا کمیٹی ناحوالہ کرے۔
