اسلام آباد۔ 27ستمبر (اے پی پی) وزیراعظم نا سلاہکار خارجہ امور سرتاج عزیز پارینے کہ بھارت نا کنڈآن پاکستان نا برخلاف آبی جارحیت یا سندھ طاس معاہدہ ئِ اسہ پلو نا وڑاٹ چٹفنگ نہ صرف سندھ طاس معاہدہ بلکن جہانی کانود نا ہم خلاف ورزی مریک۔ دننگا گام ئِ پاکستان نا برخلاف جنگ سرپند کننگک۔ بھارت معاہدہ نا رداٹ پاکستان نا بشخ انا دیر آ رن آف ریور بجلی نا ڈٹ آتے تو خلنگ کیک ولے او دیر ئِ کوڑی یا اونا مون ئِ اسہ پلو کننگ کپک۔ ورلڈ بینک دا معاہدہ ٹی کمکار ئِ ۔ سے شنبے آ قومی اسمبلی ٹی ڈاکٹر شیریں مزاری و ایلوفتا مقبوضہ کشمیر نا بارواٹی بھارت نا مخاصمانہ رویہ و سندھ طاس معاہدہ ئِ اسہ پلو نا وڑاٹ معطل کننگ نا دھڑکو آن بابت توجوہ ترفوک نوٹس نا ورندی ٹی سلاہکار خارجہ سرتاج عزیز پارے کہ مقبوضہ کشمیراٹی انسانی حق انا خلاف ورزی تیا پاکستان نا کنڈآن اقوام متحدہ نا جنرل اسمبلی ٹی پبی توار چست کننگ آ بھارت سٹپٹاہنگانے و او پاکستان نا برخلاف ہرزہ سرائی کننگ ئِ۔ اوسندھ طاس معاہدہ نا سرجم احوال آتیان ہم ایوان ئِ معلومدار کرے۔ اوپارے کہ سندھ طاس معاہدہ نا پاسداری ہڑتوم آ ملک آتا زمہ واری ئِ۔ اگہ بھارت پاکستان نا دیر ئِ توننگ نا کوشست کیک تو دا نہ صرف دامعاہدہ نا خلاف ورزی بلکن جہانی کانود نا ہم خلاف ورزی مریک۔ دننگا گام ئِ پاکستان نا برخلاف جنگ سرپند کننگک۔ دننگا گام پاکستان نا معیشت ئِ نسخان رسیفنگ نا کوشست اسے۔ اگہ بھارت داوڑکیک تو نن دا معاملہ ئِ اقوام متحدہ ٹی دننگ کینہ۔ شیریں مزاری نا سوج انا ورندی ٹی اوپارے کہ سندھ طاس معاہدہ نا کمکار جہانی بینک ئِ ، نن سلامتی کونسل نا پنچ آخبتی باسک آتون ہم دابابت ہیت کننگ اُن۔ او معاہدہ نا خلاف ورزی ئِ کیک تو نن پبی ردعمل و انڈس کمیشن نا سسٹم ئِ فعال جوڑ کینہ۔ داسا داخبرآک بننگ ئُ کہ بھارت دا معاہدہ نا رداٹ پاور ہاﺅس اس خلنگ نا سجفنگ ئِ ۔ منزہ حسن نا سوج انا ورندی ٹی سرتاج عزیز پارے کہ نن بھارت نا پاکستان نا نیام تمنگ نا غٹ ثبوت آتے ایتنہ۔ ولدا اودے اقوام متحدہ نا سیکرٹری جنرل و ایلو ملک آتے ایتنہ۔ بھارت نا اوغانستان نا کمک اٹ بلوچستان اٹی نیام تمنگ و بھارتی جاسوس نا سرجم احوال آتے دا ڈوزیئر اٹ ایتنہ۔ عمران خٹک و امیر اللہ مروت نا سوج انا ورندی ٹی اوپارے کہ بھارت رن آف ریور دیر معاہدہ نا رداٹ کاریم اٹ اتنگ کیک۔ اودے کوڑی یا کسر ئِ بدل کننگ کپک۔ سرتاج عزیز پارے کہ معاہدہ ٹی ورلڈ بینک کمکار ئس۔ معاہدہ ٹی اونا رول انا بارواٹی جاچ ہلسا معلومدار کینہ۔ اگہ بھارت معاہدہ آن انحراف کیک تو ورلڈ بینک اوٹی کڑد ادا کننگ کیک۔
