اسلام آباد۔ 22اپریل (اے پی پی) ایوان بالا ئِ پاننگانے کہ مسکوہی پنچ سال انا وخت بنجائی سیکرٹری تا کنڈآن تینا تعلقدار محکمہ غاتے ٹی بدعنوانی نا 34کیس نیب ئِ گدریفنگا۔ جمعہ آ ایوان بالا نا دیوان اٹی وقفہ سوج آتا وخت بنجائی وزیر کانود زاہد حامد پارے کہ مسکوہی پنچ سال اناوخت آ نیب راولپنڈی ئِ 7انکوائری و اسہ انوسٹی گیشن ، نیب لاہور ئِ 7انکوائری و 4انوسٹی گیشن، نیب کوئٹہ ئِ مسہ انکوائری و نیب کراچی ئِ 9انکوائری و چار انوسٹی گیشن بنجائی سیکرٹری تا کنڈآن گدریفنگانے ۔ نیب خیبر پختونخوا ، نیب ملتان ، نیب سکھر ئِ ہچ ئُ انکوائری یا انوسٹی گیشن اس بنجائی سیکرٹری تا کنڈآن گدریفنگ تنے۔ نیب راولپنڈی ٹی چار انکوائری پورو مسنو وخت اس کہ ایلوک زیر عمل ئُ۔ سینیٹر سعید غنی نا اسہ پین سوج اسینا ورندی ٹی اوپارے کہ نیب اٹی گریڈ 20و 21آ داوخت 28افسرکاریم کننگ ئُ وخت اس کہ چار افسر نیب اٹی ڈیپوٹیشن آٹی ئُ۔ چیئرمین نیب ئِ دا اختیار ارے کہ او گریڈ 20اٹی تعینات افسر آتے مسہ تو اکن گریڈ 21اٹی تعینات کے۔ کرنٹ چارج اٹی مسہ تو آن زیات ودکی کن مجاز اعلیٰ یعنی حکومت نا منظوری المی مریک۔ اگہ دن کننگ تو تو دا غیر کانودی مریک۔ سینیٹر سعید غنی نا ہی اسہ پین سوج اسینا ورندی ٹی وزیر کانود زاہد حامد پارے کہ 29افسران نیب اٹی ڈیپوٹیشن آ کاریم کننگ ئُ۔ چیئرمین نیب گریڈ 19آن 21کن مجاز افسر اسے ، افسرآتے مسہ سال انا ڈیپوٹیشن آ تعینات کننگک، صرف اسہ کیس اسے ٹی ڈیپوٹیشن نا دا وخت اٹی ودکی کننگانے۔
