اقوام متحدہ۔ 20 ستمبر (اے پی پی) صدر آزاد کشمیر سردار مسعود خان اسلامی ملک آتا تنظیم نا مقبوضہ کشمیر آ رابطہ رڑ آتون پارینے کہ مقبوضہ کشمیر اٹی بھارتی بربریت ، پیلٹ گن آتا کاریم اٹ اتنگ نا اسہ وار ولدا مذمت ئِ کرسا بھارت تون پائے کہ او آرمڈ فورسز اسپیشل پاور ایکٹ تون اوار مون انگا کانود ئِ چٹفے، اقوام متحدہ محصور کشمیر ی تے ریلیف نا فراوانی کن انسانیت نا بنداو آ راہداری پٹے۔ او آئی سی نا سیکرٹری جنرل مقبوضہ کشمیر نا حالیت آتا شدت اٹ اقوام متحدہ نا سیکرٹری جنرل و سلامتی کونسل نا صدر ئِ معلومدار کے۔ او تدوک آ دے داڑے او آئی سی رابطہ رڑ آن تران کریکہ۔ صدر آزاد کشمیر پارے کہ اینخو سال 8جولائی آ کشمیری ورنا کسرشون برہان وانی نا شہیدی آن پد سد آ کشمیری نرینہ و نیاڑی و چناتے شہید کننگانے ، پیلٹ گن آتا کاریم اٹ اتنگ آن 150 آن زیات شاری نابینا مسنو، دہ ہزار آن زیات کشمیری بھارتی کوزہ گر فوج انا بے پرخ سم کاری نا سوب آن ٹھپی مسنو۔ مقبوضہ کشمیر اٹی کشمیریک داوخت آ محصور ئُ، اوفتے آ اوفتا گل زمین آ اوفتے آعرصہ حیات ئِ تنگ کننگانے، عصمت دری ئِ دہشت تالان کننگ نا ہتھیار نا وڑاٹ کاریم اٹ اتنگ معمول ئِ، پرامن برانز جرم ئِ، سیاسی اجتماع آ پابندی ئِ، کشمیری کسرشون آتے نظر بند کننگانے، تقریر و ہن و بر آ پابندی ئِ، موبائل ٹیلی فون و انٹرنیٹ مقبوضہ کشمیر اٹی منع ئِ، تدینگوک آ دہ ہفتہ آن مقبوضہ کشمیر اٹی سخت انسانی تنکی نا کیفیت ئِ۔ صدر آزاد کشمیر پارے کہ مقبوضہ کشمیر اٹی بھارت جنیوا کنونشن نا آرٹیکل 3نا خلاف ورزی ئِ کننگ ئِ۔ اوپارے کہ نن بھارت نا دا مہم ئِ مسترد کینہ ہرانا رداٹ او کشمیری تے دہشت گرد گوندنگ ئِ وخت اس کہ کشمیریک تینٹ بھارتی کوزہ گر فوجی تا دہشت گردی نا گواچی ئِ۔ اوپارے کہ پاکستان و بھارت ہڑتوم آ نیو کلیئر ریاست ئُ، جنگ ہچ ئُ آپشن اس اف، بھارت نیو کلیئر چھتری نا کیرغ آن ریاستی دہشت گردی ئِ بند کے، تینا ڈوہ آن توجوہ ئِ اسہ پلو کننگ کن بھارت داسا سرعام پاکستان ئِ دھڑکو تننگ نا بنائِ کرینے و او بلوچستان اٹی نیام تمنگ ئِ، نن دننگا غٹ کوشست آتا مذمت ئِ کینہ ہرا کشمیر نا ویل آن توجوہ ئِ اسہ پلو کن کننگ انگ ئُ۔ اوپارے کہ نن بھارت نا داداوا ئِ مسترد کینہ کہ کشمیر اونا اٹوٹ انگ ئِ، کشمیر اسہ متنازعہ علاقہ اسے، ہرانا آخبت نا فیصلہ اقوام متحدہ نا سلامتی کونسل نا قرارداد آتا رداٹ مروئی ئِ۔ اوپارے کہ نن بھارتی دہشت گردی نا باوجود جہد آجوئی برجا تخنگ آ کشمیری تا ہمت و حوصلہ نا داد ایتنہ، نن اوفتے داکلہو ئِ ایتنہ کہ نن اوفتے تون تفوک اُن۔ اوپارے کہ کشمیرانسانی ضمیر و جہانی کانود کن اسہ ٹیسٹ کیس اسے۔ آزاد کشمیر نا حکومت و الس مقبوضہ کشمیر نا الس نا جہد آجوئی نا پبی مخ تفی ئِ برجاتخک۔ اواوآئی سی رابطہ رڑ تون پارے کہ او اقوام متحدہ نا سیکرٹری جنرل آ زورشاغے کہ او مقبوضہ کشمیر نا تنکی نا ایسری اس کشے، کشمیری تا نسل کشی و انسانیت نا برخلاف ڈوہ تیا بھارت آن ورندی طلبی کننگے، پاکستان بھارت و کشمیری تانیام اٹ ہیت و گپ کن اسہ ہندن ئُ چاگڑد اس جوڑ کروئی مرے کہ او اواری اٹ تولسا کشمیر نا ویل انا دیرپا ایسری اس پٹنگ کیر۔
