کراچی۔ 05 ستمبر (اے پی پی) بنجائی وزیر خزانہ اسحق ڈار پارینے کہ ملک اٹی اسلامک بینکاری نا مون آ دننگ کن حکومت سنجیدگی اٹ گام گیج چست کننگئِ ، معیشت ئِ سوگو کننگ کن اپوزیشن نن تون تفے۔ داخیال آتا درشانی ئِ او دوشنبے آ ورلڈ اسلامک فنانس فورم نا کنڈآن اڈ ہلوک آ کانفرنس آن تران کرسا کرے۔ اوپارے کہ ای وزارت نا منصب ئِ سنبھالنگ آن پد اسٹیٹ بینک ئِ پارت کریٹ کہ ملک اٹی اسلامک بینکاری ئِ مون آ دننگے و اوڑکن سخت حکمت عملی اس طے کننگے۔ اوپارے کہ کن تون وزیراعظم محمد نواز شریف نا ہم خواہش ئِ کہ ملک اٹی اسلامک بینکاری ئِ مون آ دننگے و دابابت اسہ کمیٹی اس اڈتننگانے ہرااسلامک بینکنگ نا سرجمی اٹ جاچ ئِ ہلکونے۔ اسحاق ڈار پارے کہ اسلامک بینکنگ نا مون آ دننگ کن داوخت اسکان 3اسلامک سینٹر فارایکسیلینس اڈتننگانے۔ اوپارے کہ ننا مذہب ہم اسلامی وڑوڈول اٹ واپار و زرکاری نا سبخ ایتک ہراڑآن سودی نظام نا خاتمہ مرے۔ اوپارے کہ کاش کن تون جادو نا چھڑی اس مسکہ تو اسلامک بینکاری ئِ 100 درسد رائج کریٹہ۔ اوپارے کہ پاکستان دنیا نا اسٹ انگاملک ئِ ہرا اسلام نا پن آ دوئی کننگا و ہراخلقت آک اسلام تون غداری کریر او تینا انجام ئِ خنار۔ بنجائی وزیر خزانہ پارے کہ اسلامک بینکاری کن اسہ کمیٹی اس اڈتننگ انگ ئِ ہراٹی گورنر اسٹیٹ بینک، ڈپٹی گورنر اسٹیٹ بینک ، بنجائی فنانس سیکرٹری، چیئرمین ایس ای سی پی، چیئرمین ایف بی آر، بنجائی لاءسیکرٹری، چیئرمین پاکستان بینکنگ ، چیئرمین شریعہ بورڈ مفتی تقی عثمانی و ایلو فک اوار مریرہ۔ اوپارے کہ ہندا ہفتہ داکمیٹی نا نوٹیفکیشن ئِ جاری کرسا اودے فعال کننگک۔ اوپارے کہ 2008 ءٹی بینکنگ سیکٹر اٹی ہراتنکی ودی مس اوکان پد اسلامک بینکاری نا اہمیت اٹی ودکی مسنے، انتئے کہ اسلامی نظام معیشت نا منصفانہ بشخ وپانٹ ، نیزگاری نا چٹفنگ و راجی انصاف تننگ نا سبخ ایتک۔ اوپارے کہ سی پیک ڈٹ ڈیہہ نا شون اٹی گیم چینجر ثابت مریک و داڈٹ اٹی اسلامی بینکاری نا کمک اٹ زرکاری کننگ مریک۔ اوپارے کہ بروک آ وخت آتیٹی پاکستان نا شمار 18 بھلا معیشت تخوک ملک آتیٹی مریک۔ اوپارے کہ پاکستان درست سمت اٹی شون نا سفر ئِ طے کننگ ئِ اونا اعتراف ئِ جہانی ادارہ غاک ہم کرینو۔ بنجائی وزیر خزانہ پارے کہ اسلامک بینکاری ٹی ننے مفتی تقی عثمانی نا کمک ہر کہول آ مسنے و ای اونا کوشست آتا ستائِ کیوہ۔ اسحاق ڈار پارے کہ اپوزیشن ملک اٹی معیشت نا شون اکن نن تون تفے۔
