بنگلہ دیش تون جتا بشخ آتیٹی تعلقداری تے ودفنگ نا خواہندار ئِ، وزیراعظم نا خصوصی کمکار امور خارجہ طارق فاطمی نا بنگلہ دیش نا پوسکنا ہائی کمشنر طارق احسان تون اوڑدہی ٹی ہیت وگپ

اسلام آباد۔ 16اگست (اے پی پی) وزیراعظم نا خصوصی کمکار امور خارجہ طارق فاطمی پارینے کہ پاکستان بنگلہ دیش تون تینا تعلقداری تے بھاز اہمیت ایتک و جتا بشخ آتیٹی اوڑتون تعلقداری تیٹی ودکی خواہک۔ سے شنبے آ داڑے بنگلہ دیش نا پوسکنا ہائی کمشنر طارق احسان تون اوڑدہی نا وخت آ ہیت وگپ کرسا او پاکستان و بنگلہ دیش نا تعلقداری تیٹی ساڑی آ چینلج آتا ایسری نا گرج آ زورشاغا و پارے کہ ننے اپریل 1974ءنا سہ کڑدہ ہی معاہدہ نا جوزہ نا رداٹ مون آ بروئی مرے۔ بڑزکو کہولی سیاسی ڈل انا درشان آتا اہمیتئِ تالان کرسا او نومبر 2014ءٹی کھٹمنڈو ٹی سارک سروک دیوان نا وخت آ ہڑتوم آ وزیراعظم آتا اوڑدہی نا حوالہ ئِ تس۔ اوپارے کہ دا اوڑدہی مفید مس و ہڑتوم آ راہشون تے ہڑتوم آ کنڈآتا تعلقداری تا ساڑی آ حالیت آتا جاچ ئِ ہلنگ و علاقائی و جہانی معاملہ غاتیا درشان خیال نا موقع ملا۔ طارق فاطمی پارے کہ بڑزکو کہولی رابطہ غاتے ہڑتوم آ کنڈآتا تعلقداری تے سوگو جوڑ کننگ نا کسر ئِ ہموار کیک۔ اوہڑتوم آ کنڈآتا تعلقداری تے پین مون آ دننگ کن ہائی کمشنر ئِ حکومت پاکستان نا پورو کمک نا باوری ترفے۔