کشمیری قوم ئِ غاصبانہ کوزہ ٹی تخسا بھارت ئِ آجوئی نا دے ئِ اڈتننگ نا ہچ ئُ حق اس اف، جہانی برادری مقبوضہ کشمیر اٹی انسانی حق انا خلاف ورزی تا نوٹس ئِ ہلے،

پنی کشمیری راہشون یاسین ملک نا اُرائی مشعال ملک نا مچی آن تران
اسلام آباد۔ 15اگست (اے پی پی) پنی کشمیری راہشون یاسین ملک نا اُرائی مشعال ملک پارینے کہ کشمیری قوم ئِ غاصبانہ کوزہ ٹی تخسا بھارت ئِ آجوئی نا دے ئِ اڈتننگ نا ہچ ئُ حق اس اف۔ او دوشنبے آ داڑے نیشنل پریس کلب نا پیشن بھارتی آجوئی دے ئِ یوم سیاہ نا وڑاٹ اڈتننگ نا وخت آ برانزی مچی آن تران کریکہ۔ یات سلے کہ مچ آ دنیاٹی رہینگوک کشمیریک بھارت نا آجوئی دے ئِ ہرسال یوم سیاہ نا وڑاٹ اڈ ایترہ۔ مشعال ملک تران کرسا پارے کہ بھارت کشمیری تے اوفتا حق تننگ آن نہ من ئِ و ایلو کنڈ تینا آجوئی دے ئِ اڈتننگ ئِ، داامر مننگ کیک کہ اسہ قوم اس ہرا ایلو قوم ئِ ظلم و جبر اٹ آجوئی نا بنداوی حق آن محروم کے و تینا آجوئی نا دے ئِ اڈ ایتے۔ اوپارے کہ ہراوخت اسکان کشمیری تے اوفتا بنداوی حق رسینگپک کشمیریک بھارت نا آجوئی دے ئِ یوم سیاہ نا وڑاٹ اڈ ترسا کیرہ۔ او مقبوضہ کشمیر اٹی بھارتی ظلم و بربریت نا مذمت ئِ کرسا جہانی برادری آ زورشاغا کہ او مقبوضہ کشمیر اٹی انسانی حق انا خلاف ورزی تا نوٹس ئِ ہلے۔