راج 69شست ئُُ نوھمی جشن آزاتی ئَ برجم داریت
پاکستانی سفارتخانہ آنی تہ ئَ بیرک ٹنگگ ئِ ھاسیں مراگش برجم دارگ بیت
اسلام آباد۔14اگست (اے پی پی) راج 69شست ئُُ نوھمی جشن آزاتی مرچی یک شمبے ئِ روچ ئَ برجم دارگ بیت اے وش ئُُ شاتی ئِ مول ئُُ مراد ھمیشن اِنت کہ ملک ئَ را ایمن ئُُ سارت کنگ بہ بیت ئُُ ناشرکاری ئِ سسا ئَ را بُن گوج کنگ بہ بیت، ملک ئَ را کوراسی ئَ چہ در کنگ ئُُ وشھالی ئِ پدیانک لِک گیجگ بہ بیت۔ جشن ئِ آزاتی ئِ موہ ئَ سرجمیں ملک ئِ لس موکل دارگ بیت، جشن آزاتی ئِ ھاترا مستریں بیرک ٹنگگ ئِ مستریں مراگش سھب ئِ 8بج ئَ کنونشن سنٹر اسلام آباد ئَ برجم دارگ بیت، ایشی ئِ تہ ئَ صدر ئِ مملکت ممنون حسین ئُُ مزن وزیر محمد نواز شریف بیرک ئُ بُرز ئَ ٹنگ اَنت۔ اے موہ ئِ سر ئَ راجی سوت جنگ بیت۔ گلگت بلتستان ئُُ آزات کشمیر ئَ ھوار چاریں صوبگ آنی دارالحکومت آنی تہ ئَ بیرک بندگ بیت۔ اے رد ئَ دانش گاہ آنی تہ ئَ ھاسیں مراگش برجم دارگ بیت۔ جشن آزاتی ئِ درگت ئَ بُنجاھی دارالحکومت ئِ سرکاری ھاسیں کارگس آناں ھم سمبئینگ بوتگ۔ اے موہ ئِ رد ئَ سیکورٹی ئِ تُرندیں انتظامیکنگ بوتگ۔ اسلام آباد ئُُ راولپنڈی ئَ سھب ئِ 6بج ئَ تاں 12بج ئَ موبائل سروس بند کنگ بوتگ اَنت۔ اسلام آباد میٹرو پولیٹن کارپوریشن ئِ نیمگ ئَ اسلام آباد ئِ ھاسیں دگ ئُُ پُل آنی سائن بورڈ آنی جنگ بوتگ ۔ ایشانی سر ئَ آزاتی ئِ جُنز ئَ ھواریں بامرد آنی نام ، باز جاھ ئَ آوانی اکس اَنت ، جشن ئِ آزاتی ئِ درگت ئَ آوانا مبارک باتی ھم نبشتگ اَنت۔ درئی کارانی دپتر ئِ کارگس ئَ آرٹ نماش کنگ بوھگ ئَ اِنت، ایشی ئِ بُن گپ ”مکسد ئِ ھاترا اِزم“ اِنت ۔ مزن وزیر ئِ مشیر سرتاج عزیز ، بُنجاھی وزیر اھوالکاری ئُُ شنگ کاری سینیٹر پرویز رشید اور مزن وزیر ئِ ھاسیں کمکار عرفان صدیقی نماش ئِ تر ئُُ تاب ئَ کن اَنت۔اسلام آباد ہائیکورٹ بار ایسوسی ایشن ئِ نیمگ ئَ اقبال ہال ئَ راجی بیرک ٹنگگ بیت، پاکستان ریلوے ئِ نیمگ ئَ جشن آزاتی ئِ درگت ئَ ھاسیں ریل گاڑی راولپنڈی ئُُ ایندگہ شہر آںروادگ بنت، اے آزاتی ریل گاڑی پشاور ئَ چہ کراچی ئَ بگر پاکستان ئِ چاریں صوبگ آنی شہر آں رونت، ایشانی وھد ئُُ پاس آیوکیں ماہ ئَ ھلاس بیت۔ 13ئُُ 14اگست ئِ نیامی شپ ئَ اسلام آباد میٹرود پولیٹن کارپوریشن ئِ چیر دستی ئَ شکرپڑیاں پریڈ گراﺅنڈ وھدیکہ ورلڈ ٹریڈ سنٹر اسلام آباد ئَ جوانیں آس لیبی ئِ بست ئُُ بند کنگ بوتگ۔ سرجمیں دُگنیا ئَ پاکستانی سفارتخانہ آنی تہ ئَ بیرک ئِ ٹنگگ ئِ ھاسیں مراگش برجم دارگ ئِ تیاری کنگ بوتگ آھود اپاکستانی ہائی کمشنر ئُُ سفیر پاکستانی کمیونٹی ئِ ھمبراھی ئَ راجی بیرک ئَ ٹنگ اَنت۔ جشن ئِ آزاتی ئِ موہ ئَ ھالتادک آنی تہ ئَ ھاسیں ایڈیشن شنگ بیت ایشی ئِ تہ ئَ پاکستان ئِ جوڑ بوھگ ئِ ھاترا داتگیں کُربانی آنا سُہرا کنگ بیت وھدیکہ ٹیلی ویژن آنی تہ ئَ ھاسیں مراگش ٹیلی کاسٹ کنگ بیت۔
