اسلام آباد۔ 12 اگست (اے پی پی) بنجائی وزیر داخلہ چوہدری نثارعلی خان تون جاپان نا سفیر تاکاشی کورائی و آسٹریلین ہائی کمشنر مارگریٹ ایڈمسن جتا جتا اوڑدہی کریر ہرافتے ٹی ہڑتوم آ ملک آتیان پاکستان نا ہڑتوم آ کنڈآتا تعلقداری و جتا معاملہ غاتیٹی جاری تین پہ تینی کمک آ ہیت وگپ مس۔ ہڑتوم آ سفیر آتا کنڈآن سانحہ کوئٹہ نا پبی مذمت و قیمتی جان تا زیان آ ڈکھ و غم نا درشانی کننگا۔ وزارت داخلہ نا ترجمان نا رداٹ جمعہ آ بنجائی وزیر داخلہ چوہدری نثارعلی خان تون جاپان نا سفیر تاکاشی کورائی اوڑدہی کرے۔ جاپانی سفیر پارے کہ جاپان دہشت گردی نا برخلاف جاری جنگ اٹی پاکستانی الس و کانود نافذ کروک آ ادارہ غاتا قربانی تے قدر انا نگاہ اٹ ہرک و ڈیہہ ٹی امن کن پاکستانی کوشست آتا ستائِ کیک، اوڑدہی ٹی پاک جاپان ہڑتوم آ کنڈآتا کمکاری ئِ پین مون آ دننگ آ اتفاق مس۔ بنجائی وزیر داخلہ چوہدری نثارعلی خان داوخت آ پارے کہ سیکورٹی ، کانود نافذ کروک آ ادارہ غاتا کارندہ غاتا کاریم نا کچ ئِ ودفنگ و ہڑتوم آ ملک آتا نیام اٹ انٹیلی جنس معلومداری تا تبادلہ نا گچین نظام اس رائج کننگ نا بابت پین کوشست و گام گیج آتا گرج ئِ۔ اوپارے کہ جاپان ہمیش پاکستان نا بے لوث مدد و کمک ئِ کرینے۔ داکان بیدس بنجائی وزیر داخلہ چوہدری نثارعلی خان تون آسٹریلین ہائی کمشنر اوڑدہ کرے ہراٹی ہڑتوم آ ملک آتیان پاکستان نا ہڑتوم آ کنڈآتا تعلقداری و جتا معاملہ غاتیٹی جاری تین پہ تینی کمکاری آ ہیت وگپ مس۔ آسٹریلین ہائی کمشنر سانحہ کوئٹہ نا پبی مذمت و قیمتی جان تا زیان آ ڈکھ و غم نا درشانی ئِ کرے۔ اوڑدہی نا وخت آ وزیر داخلہ چوہدری نثارعلی خان پارے کہ پاکستان آسٹریلیا تون تینا دوستانہ تعلقداری تے بھاز اہمیت ایتک۔ اوپارے کہ انسداد منشیات ، انسانی سمگلنگ نا توننگ، گچین بارڈر مینجمنٹ و سول ادارہ غاتا کاریم نا کچ ئِ ودفنگ نا چرجوئی ٹی اسہ ایلو نا آزموندہ و لائخی تیان استفادہ کننگ نا گرج ئِ۔
