لغور دہشت گرد آک کودک وکیل و صحافی تے بے کچ سفاکیت اتون نشانہ جوڑ کریر ، سفاکانہ و لغوری نا کارروائی تیان قوم انا حوصلہ لڑزپک
بنجائی وزیر کانود و انصاف زاہد حامد نا سانحہ کوئٹہ ٹی شہید مروک آ وکیل آتا خاہوت آتون اوڑدہی و ٹھپی مروک آتا جان پڑسی نا وخت آ ہیت وگپ
اسلام آباد، کوئٹہ۔ 12اگست (اے پی پی) بنجائی وزیر کانود و انصاف زاہد حامد پارینے کہ لغور دہشت گرد آک کودک وکیل و صحافی تے بے کچ سفاکیت اتون نشانہ جوڑ کریر، ملک دژمن عنصر آتا سفاکانہ و لغوری نا کارروائی تیان قوم انا حوصلہ لڑزپک ، نن ڈکھ انا داساہت اٹی وکلاءبرادری تون سلوک اُن۔ داخیال آتا درشانی ئِ او جمعہ آ تینا دورہ کوئٹہ نا وخت آ سانحہ کوئٹہ ٹی شہید مروک آ وکیل آتا خاہوت آتون اوڑدہی و ٹھپی مروک آتا جان پڑسی نا وخت آ کرے۔ بنجائی وزیر کانود و انصاف تون اوار وزیر مملکت کانود و انصاف ظفراللہ خان ہم کوئٹہ نا دورہ ئِ کرے و سانحہ کوئٹہ ٹی شہید مروک آ وکیل آتا خاہوت آتون ہڑزخواہی کرے۔ وزراءسی ایم ایچ کوئٹہ ٹی داخل ٹھپی مروک آتا جان پڑسی نا وخت آ اوفتا زوت جان جوڑی کن دعا کریر۔ بنجائی وزیر چیف جسٹس بلوچستان ہائی کورٹ، گورنر و وزیراعلیٰ بلوچستان تون جتا جتا اوڑدہی ہم کرے۔ داوخت آ وزیراعظم نا خصوصی کمکار و وزیر مملکت کانود و انصاف ظفراللہ خان ہم اوڑتون اوار ئسر۔ بلوچستان بار آن تران نا وخت آ بنجائی وزیر زاہد حامد پارے کہ بنجائی حکومت بلوچستان بار انا خذمت آتا ستائِ کیک و بار انا ویل آتا زوت ایسری کن سنجیدگی اٹ کوشست کننگ ئِ۔ داچرجوئی ٹی جامع حکمت عملی نا تشکیل کن میٹنگ اس ہم زوت بٹنگ انگک۔ بنجائی وزیرگورنر بلوچستان محمد خان اچکزئی تون اوڑدہی نا وخت آ پارے کہ دہشت گرد آک آزاد عدلیہ و آجوئی صحافت آ قدغن خلنگ نا مزموم کوشست اس کرینو۔ ملک دژمن عنصر پاکستان اٹی امن وایمنی نا حالیت آتے خراب کننگ کن دُنو لغوری نا کارروائی کیرہ ولے حکومت و مچ آ پاکستانی قوم اواری اٹ اوفتا عزم ئِ بے سہب جوڑ کیرہ ۔ چیف جسٹس بلوچستا ن ہائی کورٹ تون مروک آ اوڑدہی ٹی بنجائی وزیر پارے کہ دہشت گرد آتا مخ پنانے و او تینا بے سہبی و ہار ئِ ڈکنگ کن سافٹ ٹارگٹس آتے نشانہ جوڑ کرسا تینا بے سہبی ئِ درشانی ئِ کننگ ئُ۔ بنجائی وزیر آک وزیراعلیٰ بلوچستان نواب ثناءاللہ خان زہری تون ہم اوڑدہی کریر و امن و ایمنی نا بابت بنجاءنا پورو مخ تفی نا اعادہ ئِ کریر۔ بنجائی وزیر ، وزیراعلیٰ تون ہیت کرسا پارے کہ ملک ئِ داوخت اندرونی و بیرونی خلیس آک مون تروک ئُ۔ وخت انا گرج ئِ کہ نن غٹ اواری اٹ دہشت گردی نا عفریت ئِ ماس آن کشن و خسن، ظفراللہ خان پارے کہ ڈکھ انا داساہت اٹی نن بلوچستان حکومت و الس نا شانہ بشانہ سلوک اُن۔ ملک دژمن عنصر آک ملک اٹی انتشار تالان کننگ خوارہ ولے نن تینا اندرونی و بیرونی دژمن تے اوفتا ہندا مسخت آتے ٹی سرسہب مننگ کن ہلیپنہ۔
