بجلی نا غٹ ڈٹ آتے شیڈول نا رداٹ پورو کننگ کن پرعزم ئِ تانکہ ملک ئِ لوڈشیڈنگ آن نجات و صنعتی پیداوار آتے مون آ دننگے ، وزیراعظم محمد نواز شریف
مجہوئی (آزاد کشمیر)۔ 12اگست (اے پی پی) وزیراعظم محمد نواز شریف پارینے کہ ساڑی آ حکومت بجلی ناغٹ ڈٹ آتے شیڈول نا رداٹ پورو کننگ کن پرعزم ئِ تانکہ ملک ئِ بجلی نا لوڈشیڈنگ آن نجات دوئی مرے و صنعتی پیداوار ئِ مون آ دننگے۔ اوداہیت ئِ جمعہ آ داڑے نیلم جہلم ہائیڈرو پاور پروجیکٹ نا دورہ نا وخت آ دامیگا ڈٹ آ پیش رفت نا بارواٹی تروک آ بریفنگ نا وخت آ پارے۔ وزیر خزانہ اسحاق ڈار، وزیر دیر و بجلی خواجہ محمد آصف و وزیراطلاعات و نشریات پرویزرشید ہم وزیراعظم تون اوار ئسر۔ ڈٹ آ پیش رفت نا بارواٹی بریفنگ نا وخت آ اودے پاننگاکہ 82درسد کاریم پورومسنے وخت اس کہ ڈٹ انا بروخت پوروی کن کوشست آک جاری ئُ۔ وزیراعظم آزاد کشمیر راجہ فاروق حیدر ، وزیراعظم نا خصوصی کمکار سیاسی امور ڈاکٹر آصف کرمانی ہم داوخت آ ساڑی ئسر۔ وزیراعظم نیلم جہلم ہائیڈرو پاور پروجیکٹ نا ذاتی وڑاٹ چاروکی ئِ کننگ ئِ ہراڑآن 969 میگاواٹ ہڑزان پن بجلی دوئی مریک و تھرمل پاور نا پیداوار نا انحصار کم مریک۔ ڈٹ انا رداٹ مظفرآباد آن 41کلومیٹر اپ سٹریم نوسیری نا ہند آ سرنگ آتا کمک اٹ دریائے نیلم نا دیر انا رخ ئِ ایلو پلو کرسا چھتر کلاس آ پاور ہاﺅس اس اڈتننگک۔ ڈٹ انا چار ٹربائن آتیان کل 969 میگاواٹ بجلی ودی مریک۔ دا ڈٹ جنوری 2008 ءٹی بناءکننگاسس و 2017 ءنا نیام اٹی پورو مریک ۔ دا میگا ڈٹ چائنہ گی ژوبہ رڑ کمپنی پورو کننگ ئِ۔
