کاسا1000 ڈٹ آ ترندی اٹ پیش رفت جاری، نیامی مدت نا حکمت عملی نا رادٹ توانائی نا تنکی نا مون ئِ توننگ اٹی کمک رسینگک

اسلام آباد۔ 12اگست (اے پی پی) توانائی نا کاسا 1000 ڈٹ آ کاریم نا رفتار ئِ ترند کننگانے ہراڑآن نیامی مدت نا حکمت عملی نا رداٹ توانائی نا تنکی نامون ئِ توننگ اٹی کمک رسینگک۔ وزارت دیر و بجلی نا ذرائع نا رداٹ پاکستان، تاجکستان، اوغانستان و کرغزستان نا راہشونک اینخو سال مئی اٹی ”نیامی ایشیائ، سویلی ایشیائ(کاسا1000) “ بجلی ڈٹ انا اواری وڑاٹ افتتاح ئِ کریسر و اودے غٹ تعلقدار ملک و اوفتا الس نا شونہالی کن اسہ وڑ و تین پہ تینی وڑاٹ سودمند گوندنگا۔ وزیراعظم محمد نواز شریف ، تاجکستان نا صدر امام علی رحمانوف، اوغانستان نا چیف ایگزیکٹو عبداللہ عبداللہ و کرغزستان نا وزیراعظم جین بیکوف سورانبائی دوشنبے آ تقریباََ 47 کلو میٹر مروڑسنزادے شاراٹی ڈٹ انا باضابطہ بنائِ کرے۔ کاسا1000 نا رداٹ پاکستان ئِ اوغانستان نا کسرتاجکستان و کرغزستان آن اسہ ہزار میگاواٹ بجلی دوئی مریک وخت اس کہ کل 1300 میگاواٹ آن اوغانستان ئِ ہم 300 میگاواٹ بجلی ملک۔ داتکا ٹی ذیلی سٹیشن تون کرغزستان آن بناءکروک آ ٹرانسمیشن لین انا تاجکستان اٹی 4ذیلی اسٹیشن مریرہ و ولدا دا اوغانستان آن گدرینگسا نوشہرہ ٹی کنورٹراسٹیشن تون پاکستان آ سرمریک۔