اسلام آباد۔ 12اگست (اے پی پی) وزارت کانود نا کنڈآن قومی اسمبلی ئِ پاننگانے کہ قومی کمیشن برائے ہند نیاڑی تا چیئرپرسن 31دسمبر 2015ءآ سبکدوش مسوسس اوکان گڈ چیئرپرسن نا عہدہ خورک تموک ئِ ، داعہدہ غا گچینی کن وزیراعظم قائد حزب اختلاف نا صلابت آن مسہ پن پارلیمانی کمیٹی آ گدریفنہ۔ جمعہ آ قومی اسمبلی ٹی وقفہ سوج آتا وخت آ ڈاکٹر نفیسہ شاہ نا سوج انا ورندی ٹی پاننگاکہ چیئرپرسن نا گچینی کن پارلیمانی کمیٹی اسپیکر قومی اسمبلی نا کنڈآن اڈتننگانے ہراٹی 50 درسد باسک آک حکومتی و پنجا درسد حزب اختلاف نا جماعت آتیان مریرہ ۔ اوٹی اسہ تہائی اس باسک آتا گچینی سینیٹ آن مریک۔ اوپارے کہ چیئرمین نا تقرری نا فیصلہ نا اسہ تواسے ٹی اومیت ارے۔ وزیراعظم منشور نا منجملہ تجاویز آ غور کننگ کن بنجائی وزیر کانود و انصاف نا سروکی ٹی کانودی اصلاحات نا کمیٹی اس اڈتسنے۔ بنجائی وزیر کانود زاہد حامد ایوان ئِ پارے کہ دمدستی و ہڑزان انصاف تننگ حکومت نا اولین اولیت آتیان اسٹ ئِ، شاری تے دمدستی و ہڑزان انصاف کن غٹ دیوانی مقدمہ غاتا بنائی سماعت اسہ سال اسے نا تہہ ٹی کننگ ، ہردے نا بنداو آ سماعت، عدالت آتا وخت ئُ پاس اٹی ودکی، شام انا عدالت آتون اوار ایلو سلاہ غاک اوارو۔ بیلم حسنین نا سوج انا ورندی ٹی وزیر کانود زاہد حامد پارے کہ نیزگار خلقت آتے کن انصاف اسکان رسینگ نا فنڈز یا بارکونسل آن مفت کانودی کمک فراوان کننگک۔
