اسلام آباد۔ 11اگست (اے پی پی) دفترخارجہ نا ترجمان پارینے کہ کوئٹہ دہشت گرد جلہو اٹی درملکی دوخارج ازامکان اف، بھارتی اودیم ایجنسیک پاکستان اٹی خاص کر بلوچستان و کراچی ٹی تخریبی سرجزآتے ٹی اوار مسنو، بلوچستان اٹی دزگیر بھارت ایجنٹ نا اعترافی بیان آک داہیت انا صفا ثبوت ئُ۔ اوغان کمامدارآک ہیلی کاپٹر عملہ نا بحفاظت بازیابی کن ہر وڑنا کوشست کننگ نا یخین دہانی کرفینو۔ داخیال آتا درشانی ئِ او دفتر خارجہ نا ترجمان محمد نفیس زکریا پنچ شنبے آ ہفتہ وار پریس بریفنگ نا وخت آ صحافی تا جتا سوج آتا ورندی ئِ ترسا کرے۔ کوئٹہ دہشت گرد جلہو آن بابت سوج انا ورندی ئِ ترسا ترجمان پارے کہ جلہو اٹی پیشن نا عنصر آتا اوار مننگ ئِ مسترد کننگ مفک انتئے کہ بھارتی اودیم ایجنسیک پاکستان اٹی تخریبی سرجزآتے ٹی اوار مرساکرینو۔ بلوچستان اٹی دزگیر بھارتی ایجنٹ نا اعترافی بیان آک داہیت انا صفا ثبوت ئُ وخت اس کہ مسکوہی ٹی چندی سیکرٹریز خارجہ غاک ہم پاریسر کہ ننا ’پڑوسی‘ دہشت گرد آتے مالی کمک فراوان کننگ ئِ۔ مقبوضہ کشمیر اٹی مسمسل انسانی حق انا خلاف ورزی تیا گڑتی نا درشانی ئِ کرسا ترجمان جہانی برادری آن خواست کرے کہ او بھارتی بے گناہ کشمیری تیا بھارتی ظلم انا برخلاف توار چست کے۔ اوپارے کہ پاکستان بڑزکو کہول آ بھارتی ظلم انا مذمت ئِ کرینے و یو این ہیومن رائٹس کمیشن آن مقبوضہ کشمیر فیکٹ فائنڈنگ مشن گدریفنگ نا خواست کرینے۔ ترجمان پارے کہ امریکہ ، چین ، ترکی و آذربائیجان تون اوار چندی ملک ، انسانی حق انا تنظیم و این جی اوز آک مقبوضہ کشمیر اٹی حالیت آتیا بھاز گڑتی نا درشانی ئِ کرینو۔ ترجمان لائن آف کنٹرول آ دراندازی آن بابت بھارتی دوبہ ئِ مسترد کرسا پارے کہ داچرجوئی ٹی ننا موقف باالکل صفائِ، نن کس اسے ہم تینا گل زمین ئِ ملک اسے نا برخلاف کاریم اٹ ہتنگ نا موکل تفنہ۔ ترجمان پارے کہ پاکستان تینٹ دہشت گردی نا گواچی ئِ۔ اوغان صدر نا ساڑی آ بیان آن بابت اسہ سوج اسے نا ورندی ئِ ترسا ترجمان پارے کہ الزام تراشی اسہ ویل اسے نا ہم ایسری اف۔ پاکستان اوغانستان اٹی امن نا اڈتننگ و امن مذاکرات کن مخلصانہ کوشست کننگ ئِ۔ اوغانستان اٹی امن پاکستان نا تینا مفاد اٹی ئِ۔
