کوئٹہ۔ 11 اگست (اے پی پی) ڈسٹرکٹ پولیس آفیسر قلعہ سیف اللہ عابد بلوچ پارینے کہ سول ہسپتال کوئٹہ ٹی پیش بروک آ سانحہ غان پد قلعہ سیف اللہ ٹی سرکاری تنصیب آتون اوار غٹ علاقہ غاتے ٹی اول سرآن سیکورٹی پلان اس جوڑ کرسا پولیس نا گشت اٹی ہم غیر معمولی ودکی کننگانے۔ میڈیا نا نمائندہ غاتون ہیت وگپ کرسا ڈی پی او عابد بلوچ پارے کہ 11 ، چانڑدہ و 26 اگست نا بابت جتا جتا سیکورٹی پلان اڈتننگانے۔ مچ آضلع ٹی پاکستانی بیرک ، بیج و بیرک آتا بہاءکروک آ ہند آتیا سیکورٹی ٹی ودکی کننگانے و غیر معمولی واقعہ غاتون مون تننگ کن گچین گام گیج کننگانے۔ اوپارے کہ قلعہ سیف اللہ ٹی ڈوہدار بندغ آتا برخلاف کریک ڈاﺅن نا بناءمسنے وخت اس کہ کومبنگ آپریشن نا رداٹ ملک دژمن عنصر آتون ہم سختی اٹ مون تننگک۔ اوالس آن خواست کرے کہ او امن و ایمنی نا اڈتننگ کن پولیس تون کمک کیر تانکہ امن وایمنی نا حالیت آتے مثالی جوڑ کننگ مرے۔
