اسلام آباد۔ 11 اگست (اے پی پی) وزیر مملکت سائرہ افضل تارڑ پارینے کہ وزیراعظم قومی جان جوڑی پروگرام نا رداٹ ہفت مہلک ناجوڑی تا مفت درمان کننگ مریک۔ آزاد کشمیر نا ضلع کوٹلی ٹی وزیراعظم جان جوڑی نا بناءنا دود آن تران کرسا اوپارے کہ 50 درسد خلقت جان جوڑی نا ویل آتا سوب آن نیزگاری نا لکیر آن شیف زند ئِ تدیفنگ آ بیوس ئُ و خلقت آک تینا دوست آتے بچفنگ کن تینا قیمتی میراث آتے سودا کننگ آ بیوس ئُ اوپارے کہ ہندا جان جوڑی پروگرام پاکستان اٹی تینا وڑانا اسٹ انگا پروگرام ئِ ہراڑے خلقت آتے جان جوڑی نا مفت آسراتی فراوان کننگک۔ اوپارے کہ آزاد کشمیر اٹی دا پروگرام نا بناءئِ وزیراعظم نا خصوصی پارت آ کننگا اوپارے کہ داپروگرام نا رداٹ خلقت کینسر، زردوئی، بلڈ پریشر، اُشنگ انگ ، جون نا ناکارہ مننگ و حادثہ غاتا وخت آ ٹھپی مننگ نا درمان ئِ مفت کرفنگ کیرہ۔ اومستی پارے کہ دا پروگرام نا رداٹ زچہ و بچہ نا درمان و ٹرانسپورٹ نا آسراتی ہم مفت تننگک۔ وزیر مملکت سائرہ افضل تارڑ پارے کہ داپروگرام نا کنڈآن جاری کروک کارڈ انا رداٹ مریض مچ آ پاکستان اٹی غٹ سرکاری و نجی ہسپتال آتیٹی ہم درمان نا آسراتی دوئی کننگ کیرہ۔
