اسلام آباد۔ 11اگست (اے پی پی) پاکستان مسلم لیگ (ن) نا راہشون آسیہ ناز تنولی پارینے کہ پاکستان نا انٹیلی جنس ایجنسیک ملک انا دژمن آتے شکست تننگ کن دے و نن کاریم کننگ اٹی ئُ، ریڈیو پاکستان تون ہیت وگپ کرسا اوپارے کہ ملک آن دہشت گردی ئِ قومی یکجہتی تون ختم کننگ مریک۔ اوپارے کہ دہشت گرد آک ملک اٹی غیر یخینی حالیت ودی کننگ نا کوشست کننگ اٹی ئُ، اوفتے اوفتا مسخت اٹی وخت اس ہم سرسہب مننگ کن ہلیپننگک ۔ پاکستان نا سیکورٹی فورسز آک ملک انا دژمن آتے شکست تننگ کن دے و نن کوشست کننگ اٹی ئُ ۔ آسیہ ناز تنولی پارے کہ دہشت گردی نا لعنت تون مون تننگ کن ننا صف آتیٹی سوگو اتحاد ساڑی ئِ و سوگو اتحاد اتون ہی شدت پسند آتے شکست تننگ مریک۔ اومستی پارے کہ غٹ اپوزیشن جماعت آتے تنازعہ غاتا باوجود یکجا مرسا حکومتی پالیسی تون تفوئی مرے تانکہ وطن پاک ئِ دہشت گردی آن پاک کننگ مرے۔ اوپارے کہ وزیراعظم محمد نواز شریف اسہ جمہوری گچین وزیراعظم اسے و او تین پہ تینی امنائی آن قومی مفادات آتا فیصلہ کننگ کن غٹ جماعت آتے اوار دننگ خواہک۔
