ننا عزم مش آمبار سوگو ئِ و دہشت گرد آتون آہنی دوتے اٹ مون ایتنہ نن خلوک ئُ افن مہالو ہم ملک اکن قربانی تسن و پین وخت اس ہم ایتنہ
کوئٹہ۔ 11اگست (اے پی پی) وزیراعلیٰ بلوچستان نواب ثناءاللہ خان زہری پارے کہ ننا عزم مش آمبار سوگوئِ و دہشت گرد آتون آہنی دوتے اٹ مون ایتنہ نن خلوک ئُ افن مست ہم ملک اکن قربانی تسن و پین وخت اس ہم ایتنہ ہرا عنصر آک دا سمجھرہ کہ اوفتا ہتھکنڈہ غاتیان ملک انا شون سلک اوفتے کن صفائُ کلہو اسے کہ نن دُن مننگ کن الیپنہ و سی پیک ئِ ضرور جوڑ کینہ۔ وزیراعلیٰ پارے کہ قوم تیا خراب انگا حالیت آک بریرہ او قربانی ایترہ اوفتے سرسہبی ملک۔ سانحہ 8 اگست نا شہید آتا خاہوت آتے کن اسہ اسہ کروڑ روپئی تننگ ہر شہید نا اُرانا اسہ اسہ بندغ ئِ اہلیت نا رداٹ نوکری تننگ، شہید آتا چنکا چناتا تعلیمی خڑچ آتے برداشت کننگ و جونیئر وکیل آتا کاریم نا کچ اٹی ودکی کن لیگل فرٹیلٹی اکیڈمک ایکسیلنس پلان (Leagal Fertility Academic Excellence Plan) نا پڑو ئِ کرینے دا پڑوتے او سپریم کورٹ بار ایسوسی ایشن نا اسہ ڈل اسے تون اوڑدہی نا وخت آ کرے ہرانا سروکی ئِ سپریم کورٹ بار ایسوسی ایشن نا صدر سید علی ظفر کریکہ وخت اس کہ ڈل اٹی ایسوسی ایشن نا عہدیدار آتیان بیدس ہر چار آصوبہ، آزاد کشمیر و گلگت بلتستان نا وکیل آک ہم اوار ئسر صوبائی وزیر داخلہ میر سرفراز بگٹی ، چیف سیکرٹری بلوچستان سیف اللہ چٹھہ و حکومت بلوچستان نا ترجمان انوارالحق کاکڑ ہم اوڑدہی ٹی ساڑی ئسر۔ سپریم کورٹ بار ایسوسی ایشن نا ڈل دہشت گردی نا چٹفنگ کن وزیراعلیٰ بلوچستان نا عزم انا ستائِ کرسا شہید آتا وارث آتے کن بھلو امدادی پیک اسے نا پڑو آ وزیراعلیٰ نا منت واری ئِ ادا کریر۔ سپریم کورٹ بار ایسوسی ایشن نا صدر علی ظفر پارے کہ مچ آ پاکستان آن وکیل آتا نمائندہ ڈل انا دورہ کوئٹہ نا مسخت شہید آتا خاہوت آتون ہمدردی و بلوچستان نا الس تون یکجتہی نا درشانی ئِ ہراوڑوزیراعلیٰ بلوچستان ننا خواست آتے خف تورے و ہرامثبت ردعمل نا درشانی ئِ کرے او مچ آ ملک انا وکیل آتے کن سوگوی نا باعث ئِ و اوفتا حقی لیڈرشپ نا عکاسی ئِ کیک وخت اس کہ داڑآن مچ آ ملک اٹی بلوچستان نا بابت اسہ مثبت کلہو اس ہنانے کہ بلوچستا ن نا سروک و الس دہشت گردی آن خوفزدہ اف بلکن دہشت گردی نا داجنگ اٹی قربانی تننگ نا باوجود اونا چٹفنگ کن پرعزم ئِ اوپارے کہ ملک انا وکلاءبرادری کوئٹہ ٹی وکیل آتیا کروک آ جلہو ئِ مچ آ ملک انا وکیل آتیا جلہو تکک وکلاءسوسائٹی اسہ بھلو تمبہ اسے ہرا دہشت گردی آن خوفزدہ افس و کانود و آئین نا واک اتون دہشت گردی نا چٹفنگ نا جنگ اٹی شریک ئِ اوپارے کہ سی پیک ملک انا شون اکن المی ئِ ننا ہچ گہس تون سیاسی وابستگی اف صرف ریاست اہم ئِ اوپارے کہ ننا خواست ئِ کہ کومبنگ آپریشن بلوچستان تون اوار اوار مچ آ ملک بشمول سویلی پنجاب اٹی ہم کننگے و نیشنل ایکشن پلان آ اونا روح انا رداٹ عملدرآمد ئِ باوری جوڑ کننگے۔ ڈل اتون ہیت و گپ کرسا وزیراعلیٰ پارے کہ سانحہ کوئٹہ ٹی شہید مروک آ کنا ایلم و مار انا حیثیت تخارہ لغور خلقت آک کارروائی کرسا ننے آن ننا دوست آتے جتا کریر و اسہ خوانوک و باشعور تپہ اسے نشانہ جوڑ کریر وزیراعلیٰ پارے کہ سانحہ ٹی کوئٹہ نا سینئر و قابل وکیل آک شہید مسر ہراڑآن کانود نا بشخ اٹی اسہ بھاز بھلو خلاءاس ودی مس ہرادے پُر کننگ کن حکومت جونیئر وکیل آتا کاریم نا کچ اٹی ودکی کن ڈٹ بندی کرینے ہرانا رداٹ اوفتے کانود نا بشخ اٹی بڑزکو تعلیم کن پیشن نا ملک آ گدریفنگک ۔ وزیراعلیٰ پارے کہ سانحہ کوئٹہ ئِ سیاسی رنگ تننگپ دا اسہ انسانی ئُ سانحہ اسے ہرادے سیاسی رنگ تننگ آن منفی نتیجہ دوئی مریک۔ اوپارے کہ دژمنک سی پیک نا برخلاف ئُ، او خواپسہ کہ پاکستان دا ڈٹ انا کمک اٹ شون ہلے وزیراعلیٰ پارے کہ نن اسہ متحارب ڈیہہ سے ٹی رہینگنہ ۔ اوغانستان تون ننا مرغن ئُ سیم اسے شاید صوبہ آن پیشن نا خلقت آتے اندازہ اف کہ داڑے ہراحالیت آتے ٹی رہینگسا پاکستان نا جنگ ئِ کننگ ئُ۔ ولے ننا عزم مش آمبار سوگو ئِ و دہشت گرد آتون آہنی دوتے اٹ مون ایتنہ نن خلوک ئُ افن مست ہم ملک اکن قربانی تسونن و پین وخت اس ہم ایتنہ ۔ وزیراعلیٰ پارے کہ بلوچستان حکومت و سیکورٹی ادارہ غاک صوبہ نا حالیت آتیٹی گچینی ہتنگ کن اہم سرسہبی دوئی کرینو و حالیت آتیٹی 95 درسد گچینی بسنے نن دہشت گرد آتا پدرند اٹی اُن، بھارتی جاسوس کلبھوشن یادیو ئِ بلوچستان آن دزگیر کننگا ہرانا پیدواری آ بھاز انگا دہشت گردآک ہلنگار اوڑآن بیدس ہم دزگیری مسنے و دزگیر کروک آ دہشت گرد آک درملکی فنڈنگ نا اعتراف ئِ کرینو ۔ وزیراعلیٰ پارے کہ ننا جنگ اسہ نظریہ اسے نا برخلاف ئِ ہرا انسانیت دژمنی آ مبنی ئِ وزیراعلیٰ پارے کہ اگہ ضرب عضب 8 سال مست بناءکرے تو اینو حالیت آک جتا مسرہ واہم داساہم ملک و صوبہ ٹی امن و ایمنی نا حالیت آتیٹی نمان گچینی بسنے۔ وزیراعلیٰ پارے کہ ننا حوصلہ بلند ئِ و دہشت گردی نا جنگ ئِ نیم گڈلو الیپنہ بلکن اودے ایسری انجام اسکان سرکننگک۔ داوخت آ صوبائی وزیر داخلہ پارے کہ مسکوہی مسہ سال اٹی بلوچستان اٹی دہشت گردی نا اخس کہ کارروائی مسنے اوفتا زمہ وارآتے اوفتا کروک نا سزاتننگک و سانحہ کوئٹہ نا زمہ وارآتے ہم زوت کانود نا کٹہرہ ٹی ہتنگک۔ چیف سیکرٹری بلوچستان سیف اللہ چٹھہ ڈل ئِ پارے کہ وزیراعلیٰ نا پارت آتے مون آ تخسا صوبہ نا تعلیمی ادارہ غاتا سیکورٹی ئِ باوری جوڑ کننگانے و داسا ہسپتال عدالت و ایلو حساس ہند آتیا ہم فول پروف سیکورٹی تننگک۔
