سانحہ کوئٹہ ٹی پاکستان مخالف قوت آک اوارو، دژمنک خواپسہ کہ اقتصادی راہداری ڈٹ ایسری آ سرمرے
اسلام آباد۔ 09 اگست (اے پی پی) مسلم لیگ (ن) نا راہشون و قومی اسمبلی نا باسک جاوید لطیف پارینے کہ سانحہ کوئٹہ ٹی پاکستان مخالف قوت آک اوارو، دژمنک خواپسہ کہ اقتصادی راہداری ڈٹ ایسری آ سرمرے۔ او سے شنبے آ پارلیمنٹ ہاﺅس نا پیشن میڈیا تون ہیت وگپ کریکہ۔ اوپارے کہ نن حالیت جنگ اٹی اُن، اسہ ایلو نا اختلافات آتا سوب پاکستان نزور مریک ، دہشت گردی نا برخلاف غٹ ئِ یکجا مرسا جنگ کننگ نا گرج ئِ۔ اوپارے کہ دہشت گردی نا برخلاف تروک آ قربانیک رائیگاں انپسہ۔ زندہ غا قومک ڈٹ کر دہشت گردی نا مقابلہ ئِ کیرہ نن ہم کینہ قوم دہشت گرد آتیان خوفزدہ مفس نروک آ دہشت گردآک آخریکو دم ئِ ہلنگ ئُ و زوت دہشت گرد آتے پوروی اٹ چٹفنگک۔
