کوئٹہ بمب دھماکہ ٹی ”را“ نا دو ئِ ، واقعہ پری پلان اس ئس ، دہشت گرد آتا تعاقب ئِ کرسا اوفتے اوفتا جاگہ غاتیان کشسا اوفتے اوفتا کروک نا سزا تننگک ، وزیراعلیٰ بلوچستان نواب ثناءاللہ خان زہری نا میڈیا تون ہیت وگپ

کوئٹہ۔ 08اگست (اے پی پی) وزیراعلیٰ بلوچستان نواب ثناءاللہ خان زہری پارینے کہ بمب دھماکہ ٹی ”را“ انا دوئِ۔ واقعہ پری پلان اس ئس۔ دہشت گرد آتا تعاقب ئِ کرسا اوفتے اوفتا جاگہ غاتیان کشسا اوفتے اوفتا کروک نا سزا تننگک۔ دوشنبے آ میڈیا تون ہیت وگپ کرسا نواب ثناءاللہ خان زہری پارے کہ واقعہ آن گڈ سول ہسپتال کوئٹہ، بی ایم سی ، سی ایم ایچ تون اوار غٹ سرکاری ہسپتال آتیٹی ایمرجنسی ئِ نافذ کننگانے و ٹھپی مروک آتا گچین درمان نا پارت جاری کننگانے وخت اس کہ مچ آ شاراٹی سیکورٹی گام گیج آتے پین سخت کننگانے ، جمی وڑاٹ حالیت آک کنٹرول اٹی ئُ۔ وزیراعلیٰ بلوچستان پارینے کہ کودک وکیل و ہسپتال آتے ٹارگٹ کننگ داہیت انا دلیل ئِ کہ دہشت گرد آک آخریکو دم ئِ ہلنگ ئُ ۔ داوخت آ سی پیک و ایلو بھاز انگا معاملہ غاک ئُ ہرافتا سوب حالیت آتے خرابی نا کنڈا دننگ نا سازش کننگ انگ ئِ واہم ننا حوصلہ بلند ئِ و دہشت گرد آتے پد رند ئِ خلسا اوفتے اوفتا کروک نا سزا تننگک۔ اوپارے کہ بنائی احوال آتارداٹ دھماکہ خود کش ئس ۔ کانود نافذ کروک آ ادارہ غاک واقعہ نا جاست وپاست ئِ کننگ ئُ و زوت ہی غٹ حقائق آک مون آ بریرہ۔ وزیراعلیٰ پارے کہ بمب دھماکہ آن گڈ حکومت بلوچستان نا بڑزکو کہولی دیوان ئِ بٹنگ انگانے۔