بنجائی حکومت صوبائی حکومت آتے بنجائی ایجنسی تا کمک اٹ گچین رابطہ و اودیم معلومداری نا درشانی آن انسداد دہشت گردی نا بارواٹی آسراتی فراوان کیک، نیشنل ایکشن پلان و آپریشن ضرب عضب نا بھرم آتے بنجائی و صوبائی کہول آتیا رابطہ غاتا کمک اٹ سوگوی تننگک
اسلام آباد۔ 01اگست (اے پی پی) وزیراعظم محمد نواز شریف پارینے کہ بنجائی حکومت صوبائی حکومت آتے بنجائی ایجنسی تا کمک اٹ گچین رابطہ و اودیم معلومداری تا درشانی آن انسداد دہشت گردی نا بارواٹی آسراتی فراوان کیک۔ اوداہیت ئِ دوشنبے آ داخلی سلامتی نا حالیت و نیشنل ایکشن پلان آ عملدرآمد نا بارواٹی وزیراعظم ہاﺅس اٹی اڈ ہلوک آ دیوان نا کماشی ئِ کرسا پارے دیوان اٹی ملک انا داخلی سلامتی نا حالیت و نیشنل ایکشن پلان نا جتا پلو آتا بارواٹی سرجم غوروخوص کننگا۔ ہراٹی وزیرخزانہ خزانہ اسحاق ڈار ، وزیر داخلہ چوہدری نثارعلی خان، قومی سلامتی نا سلاہکار لیفٹیننٹ جنرل (ر) ناصر خان جنجوعہ ، ڈی جی آئی ایس آئی لیفٹیننٹ جنرل رضوان اختر و ڈی جی انٹیلی جنس بیورو آفتاب سلطان شرکت کریر۔ وزیراعظم پارے کہ نیشنل ایکشن پلان و آپریشن ضرب عضب نا فائدہ غاک و داوخت اسکان مروک آ پیش رفت ئِ قومی عزم انا پبی تائید اتون بنجائی و صوبائی کہول آتیا رابطہ غاتا کمک اٹ سوگوی تننگک۔ اوپارے کہ ملک درست سمت اٹی روان ئِ و ہر شاری اسہ رکھوک، سوگوو شونہال پاکستان نا بھرم آتیان مستفید مریک۔ اوپارے کہ نن ہر نسل و مذہب کن پاکستان ئِ رکھوک جوڑکینہ۔ وزیراعظم ملک اٹی امن وسلامتی ئِ برقرار تخنگ اٹی کانود نافذ کروک آ ادارہ غاتا کارکڑد انا ستائِ کرینے۔ اوپارے کہ ننا بہادر کانود نافذ کروک آ ادارہ غاتا بے شمار قربانی، کل قوم انا غیر متزلزل عزم و بنجائی و صوبائی حکومت آتا سخت کوشست آتا بدولت ملک آن دہشت گردو انتہاپسند عنصر آک پسپا مننگ ئُ۔ اوپارے کہ انتہاءپسند نظریہ اسہ جہانی ئُ خلیس اسے ، دہشت گردی نا برخلاف جنگ اٹی فرنٹ لائن اسٹیٹ نا حیثیت آن پاکستان کیہی سال آن دہشت گردی نا ردعمل آن زہمی مسنے۔ اوپارے کہ دہشت گردی و انتہاءپسندی نا لعنت تون جنگ کرسا راجی و اقتصادی لحاظ آن پین اسہ ملک اس ہم داخلہ زیات زہمی متنے اخس کہ پاکستان مسنے۔ وزیراعظم است جمی نا درشانی ئِ کرسا پارے کہ دنیا امنا کرینے کہ ملک اٹی سلامتی نا جمی حالیت آک جاری نیشنل ایکشن پلان و آپریشن ضرب عضب نا بناءنمان وڑاٹ گچین مسنو۔
