ریلوے ءِ وفاقی وزیر ءَ ازبکستان ءِ سروکی ءُ الس ءَ را 35می آجوئی ءِ روچ ءِ مبارک بات داتگ، دو نیمگی سیادی ءَ را مھکم کنگ ءِ وعدہ

اسلام آباد۔1ستمبر  (اے پی پی): ریلوے ءِ وفاقی وزیر محمد حنیف عباسی ءَ ازبکستان ءِ 35می آجوئی ءِ روچ ءِ درگت ءَ صدر شوکت میرزیوف، حکومت ءُ براتیں ازبکستان ءِ اُلس ءَ را دل ءِ جہلانکی ءَ چہ مبارکی دات۔ ریلوے ءِ وزیر ءَ وتی مبارکی کلوہ ءِ تہ ءَ گوشت کہ پاکستان ءُ ازبکستان ءِ نیام ءَ وت مہ وتی احترام، مہر ءُ یکجائی اقدار آنی بنیات ءَ گہتریں، براتی ءُ دوستی ءِ سیادی است انت۔ آئی ءَ اے گپ ءِ سر ءَ زور پر دات کہ دوئیں براتیں ملک آنی نیام ءَ تجارتی ، اقتصادی ءُ دمگی سیادی آنی دیمروئی ءِ واستہ سک باز موہ است انت۔ محمد حنیف عباسی ءَ گوشت کہ ریلوے نیٹ ورک ءِ دیمروئی ءَ چہ نا ایوک ءَ دوئیں ملک آنی گوما بلکینگ ءَ سرجمیں میان اُستمانی ایشیا ءِ گوما اقتصادی ءُ تجارتی سیادی آناں نوکیں رنگ ءُ دروشم دات کنت۔ آئی ءَ وتی جزم ءِ یک رندے پدا گوشت کہ پاکستان ازبکستان ءِ گوما دو نیمگی کمک ءَ را گیش مھکم کنگ ءُ مردم آنی نیام ءَ رابطہ آناں گیش کنگ ءِ واھشت مند اِنت۔ وفاقی وزیر ءَ ازبکستان ءِ دیمروئی، استحکام، وشھالی ءُ آئی ءِ اُلس ءِ ھاتر ءَ وشیں آیوکیں وھد ءِ ھاتر ءَ وتی نیکیں واھشت ھم درشان کتگ اَنت۔