پاکستان ءُ چین ءِ دوستی دمگی ءُ جھان ءِ چیلنجانی بدل بوھگ ءَ ابید ھم مھکم انت، فیلڈ مارشل سید  عاصم منیر

راولپنڈی۔1اگست  (اے پی پی): پاکستان ءُ چین ءِ نیام ءَ مھکمیں سیادی ءِ سر ءَ چمشانک دیان ءَ فیلڈ مارشل سید  عاصم منیر ءَ گوشت کہ دوئیں ملک آنی نیام ءَ دوستی بے درور اِنت، وھد ءِ چکاس اِنت ءُ دمگی ءُ جھان ءِ چیلنج آنی بدل بوھگ ءَ ابید ھم مھکم اِنت۔ شمبے ءِ روچ ءَ انٹر سروسز پبلک ریلیشنز ءِ نیمگ ءَ چہ جاڑی بوتگیں پریس ریلیز ءِ رد ءَ چین ءِ راجی آجوئی ءِ اُرد ءِ جوڑ بوھگ ءِ 99می سالروچ راولپنڈی ءِ جنرل ہیڈ کوارٹر ءَ برجم دارگ بوتگ۔ اے موہ ءِ سر ءَ پاکستان ءَ چین ءِ سفیر جیانگ زائی ڈونگ ءِ ھاسیں مہمان ات۔ چین ءِ دفاعی اتاشی  میجر  جنرل وانگ ژونگ، چینی سفارتخانہ ءِ کارندہ ءُ پاکستان ءِ سئے سلاہ بندیں اُرد ءِ مزنیں افسراں ھم مراگش ءَ بھر زرتگ۔ فیلڈ مارشل سید عاصم منیر، این آئی (ایم)، ایچ جے،چیف آف آرمی اسٹاف اور چیف آف ڈیفنس فورسز  ءَ شرپداریں مہمان آناں وش اتک کت ءُ پی ایل اے ءَ را 99 سالی روچ ءِ مبارک بات دات۔ آہاں چین ءِ دفاع، راجی دیمروئی ءُ میاں اوستمانی امن ءُ ایمنی ءِ ھاتر ءَ پی ایل اے ءِ جوانیں کرد ءَ را توسیپ ءُ ستا پیش کت۔ فیلڈ مارشل ءَ پاکستان ءُ چین ءِ سیادی ءِ برجاھیں مھکم ءِ سر ءَ چمشانک دیان ءَ گوشت کہ دوئیں ملک آنی نیام ءَ دوستی بے درور اِنت، وھد ءِ آزمائش بوتگ ءُ بدل بوھوکیں دمگی ءُ جھان ءِ چیلنج آنی باوجود مھکم اِنت۔ آئی ءَ اے گپ ءِ پدا پدر کت کہ پاکستانی اُرد ءُ پی ایل اے راستیں شریک اَنت، آ یکے دومی ءِ سر ءَ بھروسہ، بے مٹیں کمک ءُ دمگی امن، برجائی ءُ یکجائی اسٹریٹجک مفاد آنی رکھینگ ءِ واستہ جزم ءِ پابند اَنت۔ مراگش ءَ گوں تران کنان ءَ سفیر جیانگ زیڈونگ ءَ اے یادگاری مراگش ءِ برجم دارگ ءِ ھاتر ءَ فیلڈ مارشل ءِ دل ءِ جہلانکی ءَ چہ منت گپت۔ آئی ءَ ناشرکاری ءِ ھلاپ ءَ جنگ ءَ پاک اُرد ءِ ھاسیں ازمت ءُ قربانی آناں من اِت ءُ پاکستان ءِ واستہ چین ءِ بے دروریں کمک ءُ دوئیں ملک آنی نیام ءَ ہر موسم ءِ اسٹریٹجک شریکداری ءَ را گیش مھکم کنگ ءِ واستہ چین ءِ مھکمیں جزم ءِ سر ءَ پدا زور دات۔