آبادی ءِ گیش بوھگ مزنیں چیلنج اِنت، حکومت ءِ ھمراھی ءَ چاگرد ءِ ھر یک مردمے ءَ را کردے پیلو کنگی اِنت، سینئر صوبائی وزیر مریم اورنگزیب

لاہور۔2جولائی  (اے پی پی): پنجاب ءِ سینئر صوبائی وزیر مریم اورنگزیب ءَ گوشت کہ گیش بوھوکیں آبادی پاکستان ءِ دیم ءَ مزنیں چیلنج جوڑ بوتگ، ایشی ءَ را کنٹرول کنگ ءِ واستہ آئی ءَ را راجی ایجنڈا جوڑ کنگی اِنت ءُ حکومت ءِ گوما چاگرد ءِ ہر یک مردمے ءَ را وتی کرد پیلو کنگی اِنت۔ پنچ شمبے ءِ روچ ءَ روزنجی ہوٹل ءَ مراگش ءَ گوں تران کنان ءَ آئی ءَ گوشت کہ مزن وزیر محمد شہباز شریف ءَ راجی آبادی کونسل ءِ جار جتگ ایشی ءِ تہ ءَ درستیں صوبگ آنی سر وزیر ھوار اَنت۔ آئی ءَ گوشت کہ آبادی ءِ گیشی ءِ ھوالگ ءَ روایتی سوچ ءَ چہ عملی گامگیج زورگ لوٹ ایت، پرچا کہ دیمروئی منصوبگ ءُ وسیلگ آبادی ءِ کساس ءَ را ھیال ءَ دارگ ءَ منصوبگ بندی کنگ بنت۔ مریم اورنگزیب ءَ گوشت کہ سر وزیر پنجاب ءَ گیش بوھوکیں آبادی ءَ را کنٹرول کنگ ءِ پیسلہ کتگ ایشی ءِ واستہ یک ٹوھیں حکمت عملی ءِ جوڑ کنگ بوھگ ءَ انت۔ آئی ءَ گوشت کہ تاں وھد ءَ ھرچ شہری آبادی ءِ توازن ءِ دارگ ءِ راجی مول ءُ مراد ءَ حکومت ءِ کمک ءَ مہ کنت گڈا اے جیڈھ ءَ را جوانیں رنگ ءَ کنٹرول کنگ ممکن نہ بیت۔ آئی ءَ گوشت کہ پاکستان ءِ آبادی نزیک ءَ 240 کروڑ انت وھدیکہ پنجاب ءِ آبادی 130 کروڑ انت۔ پنجاب ءِ سر وزیر ءِ کارگس ءِ سر ءَ قبضہ کنگ ءَ پد آبادی ءِ ھوالگ ءَ راستیں ڈیٹا جوڑ کنگ ءَ را اولیت دیگ بوتگ ءُ اے ڈیٹا جولائی ءَ تاں سرجم کنگ بیت ایشی ءَ چہ آیوکیں منصوبگ بندی ءَ را آسراتی رسیت۔ سینئر صوبائی وزیر ءَ گوشت کہ آبادی ءِ تہ ءَ گیشی ءِ سبب ءَ وانگ ءُ زانگ، جان سلامتی ءُ ایندگر شوبگ آنی واستہ ایر کنگ بوتگیں وسیلگ آنی سر ءَ دباؤ گیش بیت۔ اے درگت ءَ سر وزیر پنجاب ءَ 10ضلع آنی تہ ءَ اسکول میلز پروگرام بندات کتگ۔ آئی ءَ زانتکار، میڈیا ءُ چاگرد ءِ ایندگر تبک آناں زور پر دات کہ آ آبادی ءِ تہ ءَ گیشی ءِ بابت ءَ سرپدی پیداک کنگ ءِ تہ ءَ وتی کرد ءَ پیلو بہ کن اَنت۔ آئی ءَ گوشت کہ سر وزیر پنجاب ءِ واھشت اِنت کہ درستیں نودربر آناں لیپ ٹاپ ءُ اسکالرشپ ءِ پجارینگ بہ بیت، البت وسیلگ آنی بھر ءُ بانگ ءِ تہ ءَ گیش بوھوکیں آبادی مزنیں چیلنج جوڑ بوھگ ءَ اِنت۔ کاہنہ ءَ ٹیوشن سینٹر ءِ ماڑی ءِ کپگ ءِ سر ءَ دلپدردی ءِ درشان کنان ءَ مریم اورنگزیب ءَ گوشت کہ اے سکیں دل کشیں وئیل اِنت۔ ریسکیو ٹیم فوراً جاہ ءَ سر بوتگ انت، البت حادثہ پیسرا بوتگ ات۔ آئی ءَ چہ مات ءُ پتاں لوٹ کتگ کہ آ اے گپ ءَ گوں دلجمی ءَ بہ چار اَنت کہ آیا آیانی زھگ ھما وانگ ءُ زانگ ءِ ادارگ یا ٹیوشن سینٹر ءَ روگ ءَ اَنت آ ایمن اِنت یا نہ۔ آئی ءَ گوشت کہ حکومت ءَ وتی ذمہ واری آناں پیلو کنگ ءِ تہ ءَ ھچ وڑیں سنگ ءُ سنگ یلہ نہ داتگ، البت یکجائی ذمہ واری ءِ احساس ھم ناگزیر اِنت۔