وفاقی وزیر محمد حنیف عباسی ءَ پاکستان ریلوے ءَ را سرجمیں ڈیجیٹل ادارگ جوڑ کنگ ءِ وعدہ کتگ، درستیں جاری ءُ پیش کرتگیں منصوبگ آناں وھد ءِ سر ءَ سرجم کنگ ءُ ڈیجیٹل سروسز ءَ را گیش ترند ءُ مردم دوست جوڑ کنگ ءِ وعدہ کتگ

اسلام آباد۔2جولائی  (اے پی پی): وفاقی وزیر برائے ریلوے ءِ سروکی ءَ پاکستان ریلوے ءِ ڈیجیٹل ٹرانسفارمیشن ءِ ھوالگ ءَ یک ھاسیں دیوان ءِ برجم دارگ بوت، ایشی ءِ تہ ءَ سیکرٹری ریلوے، سی ای او ریلوے ءُ آئی ٹی ٹیم ءَ بھر زوری کت۔ دیوان ءَ پاکستان ریلوے ءَ را نوکیں ءُ ایمن جوڑ کنگ ءِ واستہ توامیں جاری ءُ پیش کرتگیں ڈیجیٹل منصوبگ آناں وھد ءِ سر ءَ سرجم کنگ ءِ واستہ ھاسیں پیسلہ کنگ بوت، الس ءِ آسراتی ءِ واستہ توامیں ڈیجیٹل سروسز ءَ را گیش موثر ءُ ترند جوڑ کنگ ءُ راولپنڈی ءِ ماڈل ءِ سر ءَ دگہ مزنیں اسٹیشن آنی سر ءَ زوت ’’سمارٹ اینڈ سیف ریلوے اسٹیشن‘‘ جوڑ کنگ ءِ واستہ ھاسیں پیسلہ کنگ بوتگ۔ گند ءُ نند ءِ ساھت ءَ پاکستان ریلوے ءِ ڈیجیٹلائزیشن ءِ ھوالگ ءَ برجاہیں منصوبگ ءُ آیوکیں سال ءِ مول ءُ مراد آنی سر ءَ ھم چار ءُ تپاسی کنگ بیت۔ اے موہ ءِ سر ءَ وفاقی وزیر برائے ریلوے ءَ گوشت کہ مزن وزیر ءِ وژن ءِ رد ءَ پاکستان ریلوے وتی 78سال ءِ راجدپتر ءَ را ڈیجیٹل کنگ ءَ اِنت ءُ ڈیجیٹل ٹرانسفارمیشن ءِ تہ ءَ دیم ءَ اِنت۔ دیوان ءَ مسافر آناں داتگیں نوکیں آسراتی آنی ھوالگ ءَ سرجمیں بریفنگ دیگ بوت، ایشی ءِ تہ ءَ ھال دیگ بوت کہ اے وھد ءَ ربیتا ایپ ءِ سر ءَ 100 ءَ چہ گیش ٹرین دستیاب اَنت ءُ انوگ ءَ تاں 60 مزنیں ریلوے اسٹیشن سرجمی ءَ ڈیجیٹل کنگ بوتگ اَنت۔ مسافر آنی ترندیں کمک ءِ واستہ ریلوے ہیلپ لائن 117 ہفتگ ءِ ہفت روچ ءَ 24کلاک ءَ چالو کنگ بوتگ کہ اودا تربیت یافتہ آئی ٹی ایجنٹ شپ ءُ روچ سروسز ءِ دیم ءَ آرگ ءَ انت۔ ایشی ءَ ابید مزنیں ریلوے اسٹیشن آنی سر ءَ مفت وائی فائی ءِ آسراتی دیگ بوتگ کہ ایشی ءَ چہ تاں انوگ ءَ ریلوے ءِ وسیلگ ءَ سفر کنوکیں مسافر آنی تہ ءَ 70درسد ءِ نزیک ءَ ٹرانسپورٹ ءِ آسراتی ھوار بوتگ۔ دیوان ءَ گوشگ بوت کہ راولپنڈی ءَ ‘سمارٹ اینڈ سیف ریلوے اسٹیشن’ ءِ کار ءِ سوبمندیں رنگ ءَ بنگیج کنگ بوتگ ءُ استیں منصوبگ ءِ رد ءَ ایشی ءَ را زوت ایندگہ مزنیں اسٹیشن آنی سر ءَ ھم عمل کنگ بیت۔ حکام ءَ دیوان ءَ را بار ءُ انتظامی کار آنی ڈیجیٹل کنگ ءِ بابت ءَ ھم سرپدی داتگ۔ بریفنگ ءِ ساھت ءَ فریٹ مینجمنٹ سسٹم، رولنگ اسٹاک ٹریکنگ، ڈیجیٹل وزن پل، ای انسپکشن سسٹم ءُ نوکیں حاضری انتظامی سسٹم ءِ سر ءَ عمل درآمد ءِ سر ءَ تاں انوگ ءَ بوتگیں پیشرفت ءِ سر ءَ چار ءُ تپاسی کنگ بیت۔ ریلوے ءِ وفاقی وزیر ءَ اے درستیں ڈیجیٹل سروسز ءَ را گیش موثر، ترند ءُ الس دوست جوڑ کنگ ءِ ھاترا ھاسیں پنت ءُ شون داتگ۔ گند ءُ نند ءِ ساھت ءَ آیوکیں مالی سال ءِ ساھت ءَ بندات کنگ بوھوکیں بازیں مزنیں ڈیجیٹل منصوبگ آنی سر ءَ ھم سرجمیں ھیال ءُ لیکہ کنگ بیت۔ اے منصوبگ آنی تہ ءَ 1700کلومیٹر ءِ دراجیں فائبر آپٹک بس ٹرانسمیشن نیٹ ورک ءِ سرجمی ءُ یک سرجمیں ’فریٹ ڈیجیٹلائزیشن ایکو سسٹم‘ ءِ جوڑ کنگ ھوار اِنت۔ ایشی ءِ گوما جی پی ایس بس ٹریکنگ سسٹم ءِ وسیلگ ءَ مسافر آناں نوکیں سفری آسراتی ءِ پجارینگ ءُ نوکیں سگنلنگ سسٹم ءِ نفاذ ءِ وسیلگ ءَ محکمہ ءِ ٹرین ءِ آپریشن، سیفٹی ءُ کارکردگی ءَ را گیش گہتر کنگ ءِ منصوبگ آنی سر ءَ ھم ھیال ءُ لیکہ کنگ بوتگ۔ گند ءُ نند ءِ گڈ ءَ ریلوے ءِ وفاقی وزیر ءَ جاری ءُ پیش کرتگیں درستیں منصوبگ آنی وھد ءُ پاس ءِ سر ءَ زور پر دات ءُ گوشت کہ پاکستان ریلوے ءَ را یک نوکیں، ایمن ءُ سرجمی ءَ ڈیجیٹل ادارگ جوڑ کنگ حکومت ءِ اولی ترجی انت۔