مزن وزیر شہباز شریف ءَ وزارت جان سلامتی ءَ را پنت ءُ شون  کتگ کہ ہیپاٹائٹس، ایڈز ءُ اے دگہ نادراہیانی وھد ءُ پاس ءِ رپورٹنگ ءِ واستہ یک یکجاھیں نظام ءِ جوڑ کنگ بہ بیت

اسلام آباد۔5مئی  (اے پی پی): مزن وزیر محمد شہباز شریف ءَ صوبائی حکومت آنی کمک ءَ ہیپاٹائٹس، ایڈز ءُ ایندگر نادراھی آنی وھد ءِ سر ءَ رپورٹنگ ءِ واستہ یک یکجاھیں نظام ءِ جوڑ کنگ ءِ پنت ءُ شون  کتگ ءُ گوشت کہ جان سلامتی ءِ واستہ جوانیں ازمت آنی پھجاری حکومت ءِ اولی ترجی آں چہ یکے ۔ آئی ءَ اے ھیالانی درشانی وزارت جان سلامتی ءِ کار آنی ھوالگ ءَ جائزہ ءِ دیوان ءَ گوں گشتانک ءِ ساھت ءَ کت ایش مزن وزیر ءِ سروکی ءَ سئے شمبے ءِ روچ ءَ برجم دارگ بوت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ دیوان ءَ وفاقی وزیر اقتصادی امور احد خان چیمہ، وزیر خزانہ محمد اورنگزیب ، وفاقی وزیر قومی جان سلامتی  سید مصطفیٰ کمال،  وزیر مملکت برائے صحت ڈاکٹر مختار احمد بھرتھ، مزن وزیر   ءِ  فوکل پرسن برائے پولیو  ءِ گر ءُ دار سینیٹر عائشہ رضا فاروق   ءُ سیادی داروکیں کارندہ ساڑی اتنت۔ مزن وزیر ءَ دیوان ءَ گوں گشتانک دیان ءَ گوشت کہ شہری آنی جان سلامتی ءِ واستہ جوانیں ازمت آنی پجاری حکومت پاکستان ءِ اولی ترجی آنی تہ ءَ یک انت۔ آئی ءَ گوشت کہ ما کجام ھم ارزشتی ایں جان ءِ رکھینگ ءِ واستہ کجام ھم سیمسر، کجام ھم رکاوٹ ءُ کجام ھم قربانی ءَ چہ دیم ءَ روگ ءَ تیار آں۔ مزن وزیر ءَ پنت ءُ شون  کت کہ ہیپاٹائٹس ءُ ایڈز ءِ وڑیں وبائی نادراہی آنی سرجمی ءَ ھلاسی ءِ واستہ توامیں سرکاری ہسپتال آنی تہ ءَ توامیں نادراہ آنی اسکریننگ دل یکیمی کنگ بہ بیت۔ آئی ءَ وزارت ءِ راجی جان سلامتی ءَ را پنت ءُ شون  کت کہ صوبائی حکومت آنی کمک ءَ ہیپاٹائٹس، ایڈز ءُ اے دگہ نادراہی آنی وھد ءُ پاس ءِ رپورٹنگ ءِ واستہ یک یکجاھیں نظام ءِ جوڑ کنگ بہ بیت۔ مزن وزیر ءَ گوشت کہ ایوک ءَ وھد ءِ سر ءَ پجار کنگ ءَ چہ اے نادراھی آنی سرجمی ءَ ھلاسی ممکن بیت۔ آئی ءَ پنت ءُ شون  کت کہ وزارت جان سلامتی ءَ را صوبہ آنی کمک ءَ ہپاٹائٹس ءِ اسکریننگ، ٹیسٹ ءُ درمان ءِ واستہ ”مزن وزیر ءِ ہپاٹائٹس کنٹرول پروگرام“ ءِ سرا عمل درآمد ءَ را ترند کنگ بہ بیت۔ مزن وزیر ءَ ڈراپ ءُ ایندگر ادارگ آناں پنت ءُ شون  کت کہ سرجمیں ملک ءَ آٹو ڈس ایبل (ای ڈی) سرنج ءِ کارمردی ءَ را دل یکیمی کنگ بہ بیت تانکہ وائرل نادراہی ءِ شنگ ءُ تالان ءَ را گر ءُ دار کنگ بہ بیت ءُ سرنج ءِ پدا کارمرد کنگ ءِ سرجمیں گر ءُ دار ءَ را دل یکیمی کنگ بہ بیت۔ آئی ءَ پاکستان ءَ چہ پولیو ءِ نادراھی ءَ سرجمی ءَ ھلاس کنگ ءِ جزم ءِ ھم درشان کتگ۔ گند ءُ نند ءَ مزن وزیر ءَ را پولیو، ہیپاٹائٹس ءُ ایڈز ءِ ھلاسی ءِ واستہ برجاھیں گامگیج آنی بابت ءَ سرپدی دات، ایشی ءِ تہ ءَ گوشگ بوت کہ ایڈز ءِ ھلاسی ءِ واستہ ملک ءِ مزنیں اسپتال آنی تہ ءَ 98 اینٹی ریٹرو وائرل تھراپی سنٹر جوڑ کنگ بوتگ، ایشی ءِ کساس یک سال ءِ تہ ءَ 164 ءَ چہ گیش کنگ بیت۔ ملک ءَ واتر بوؤکیں ناجائزیں مہاجرین ءِ واستہ درستیں میاں اوستمانی بالی پٹ آنی سر ءَ ایڈز ءِ اسکریننگ ءِ آسراتی بندات کنگ بوتگ۔ بریفنگ ءِ رد ءَ ہیپاٹائٹس سی ءِ ھلاپ ءَ مزن وزیر ءِ راجی پروگرام ءِ پائلٹ پروجیکٹ زوت اسلام آباد، آزات کشمیر ءُ گلگت بلتستان ءَ بندات کنگ بیت۔ دیوان ءَ را ھال دیگ بوت کہ چاگردی نمونہ آنی نوکیں ٹیسٹ آنی تہ ءَ پولیو وائرس ءِ ھست بوھگ کم کم ءَ کم بوھگ ءَ اِنت کہ اے وش آتک اِنت، پولیو ءِ ھلاپ ءَ نوکیں مہم ءِ تہ ءَ کوریج 98% ءَ برجاہ بوتگ۔