پاکستان ءَ را برآمدات ءِ سروکی ءَ معیشت ءِ تہا بدل کنگ وھد ءِ لوٹ انت، قیصر احمد شیخ

اسلام آباد۔5مئی  (اے پی پی): سرمایہ کاری بورڈ ءِ وفاقی وزیر قیصر احمد شیخ ءَ گوشت کہ پاکستان ءَ را درآمد ءِ سر ءَ بڈوئی کنوکیں معیشت ءَ چہ برآمد ءِ سر ءَ مھکمیں معیشت ءِ تہ ءَ بدل کنگ وھد ءِ ضلورت اِنت۔ سئے شمبے ءِ روچ ءَ پاکستان چین ءِ صنعتی گپ ءُ تران ءَ گوں گشتانک دیان ءَ آئی ءَ گوشت کہ سی پیک دومی بھر ءِ چیر دستی ءَ صنعتی کمک، کاروباری شریکداری ءُ صنعتی ٹرانسفر ءَ را دیمروئی دیگ ءِ سر ءَ ھاسیں دلگوشی دیگ بوھگ ءَ انت۔ وفاقی وزیر ءَ گوشت کہ انوگ ءَ تاں چین پاکستان اقتصادی راہداری ءِ چیر دستی ءَ نزیک ءَ 30ارب ڈالر ءِ سرمایہ کاری کنگ بوتگ ایشی ءِ آسر ءَ 261ہزار ءَ چہ گیش روزگار ءِ موہ پیداک بوتگ۔ آئی ءَ گوشت کہ سی پیک ءِ دومی بھر ءَ پاکستان ءِ صنعتی بنیات ءَ را گیش مھکم کنگ ءِ واستہ صنعتی شوبگ، ھاسیں اقتصادی زون، ٹیکنالوجی ءِ ٹرانسفر ءُ بزنس ٹو بزنس (بی ٹو بی) ءِ سیادی ءِ سر ءَ ھاسیں زور دیگ بوھگ ءَ اِنت۔ قیصر احمد شیخ ءَ گوشت کہ حکومت سرمایہ کار دوستیں پالیسی آنی وسیلگ ءَ کاروباری چاگرد ءَ را گیش گہتر کنگ ءَ انت۔ آئی ءَ گوشت کہ درملکی سرمایہ کاری ءَ را گیش کنگ ءِ واستہ ھاسیں اقتصادی زون آنی تہ ءَ سرمایہ کاری کنوک آناں دگہ 9سال ءِ واستہ ٹیکس ءِ رعایت ءَ ھوار جتا جتائیں ترغیب دیگ بوھگ ءَ اِنت۔ وفاقی وزیر ءَ گوشت کہ چینی صنعت آناں پاکستان ءَ را دیم دیگ ءَ چہ نہ ایوک ءَ صنعتی دیمروئی ءَ را گیش کنگ بیت بلکینگ ءَ ملک ءِ برآمدات آنی تہ ءَ ھم مزنیں کساسے ءَ گیشی بیت ایشی ءَ چہ تجارتی خسارہ ءَ را کم کنگ ءَ کمک رسیت۔ آئی ءَ پاکستان ءُ چین ءِ نیام ءَ صنعتی کمک ءَ را نوکیں کوڑھ آنی سر ءَ برگ ءِ جزم ءِ درشان کت۔ آئی ءَ گوشت کہ پاکستان ءِ جوانیں امیج جھان ءِ تک ءَ گہتر بوھگ ءَ اِنت ءُ درملکی سرمایہ کار ادا سرمایہ کاری ءِ موہ آنی تہ ءَ سک باز دلگوشی دیگ ءَ اَنت ھاسیں رنگ ءَ پاکستانی ءُ برطانیہ ءَ نندوکیں سرمایہ کار آنی نیمگ ءَ سرمایہ کاری ءِ تہ ءَ گیشی ءِ رجحان ءَ را وش اتک کنگ بیت۔ وفاقی وزیر ءَ گوشت کہ بورڈ آف انویسٹمنٹ کاروباری آسراتی آناں گہتر کنگ، سرمایہ کاری ءِ عمل ءَ را آسان کنگ ءُ سرمایہ کار آنی دیم ءَ اوشتاتگیں رکاوٹ آناں دور کنگ ءِ واستہ زبردستیں گامگیج کنگ ءَ انت۔ اے موہ ءِ سر ءَ تران کنان ءَ چینی قونصل ءَ پاکستان ءُ چین ءِ نیام ءَ جتا جتائیں شوبگ آنی تہ ءَ دو نیمگی کمک ءِ واستہ مزنیں موہ آنی سر ءَ زور پر دات۔ آئی ءَ گوشت کہ سی پیک دومی بھر ءِ چیر دستی ءَ صنعتی دیمروئی دوئیں ملک آنی واستہ اقتصادی برجائی ءُ وت مہ وتی وشھالی ءِ وسیلگ بیت۔ آئی ءَ گوشت کہ پاکستان ءُ چین آہنی دوست انت ءُ صنعتی، بیپاری ءُ اقتصادی کمک ءَ را گیش دیمروئی دیگ ءِ واستہ جزم انت۔\932