مزن وزیر شہباز شریف ءَ ترکی ءَ سیلاب ءِ سبب ءَ جانی ءُ مال ءِ تاوان ءِ سرا دلپدردی ءِ درشانی کتگ

اسلام آباد۔5مئی  (اے پی پی): مزن وزیر محمد شہباز شریف ءَ ترکی ءَ تباہ کنوکیں سیلاب ءُ ھئور ءِ سبب ءَ گران بھائیں جانی ءُ مال ءِ تاوان ءِ سر ءَ سکیں دلپدردی ءُ اپسوز ءِ درشانی کتگ ءُ ترکی ءِ الس ءَ گوں یکوئی ءِ درشانی کتگ۔ سئے شمبے ءِ روچ ءَ سوشل نیٹ ورکنگ ویب سائٹ ایکس ءِ سر ءَ جاڑی بوتگیں بیان ءِ تہ ءَ مزن وزیر ءَ گوشت کہ ترکی ءِ صوبگ غازیانٹیپ، سانلیورفا، آدیامان ءُ ایشی ءِ نزیکیں دمگ آنی تہ ءَ تباہ کنوکیں سیلاب ءُ موسم ءِ شدیدیں جاور ھال آنی سبب ءَ گران بھائیں جانی ءُ مال ءِ تاوان بوتگ، ایشی ءَ چہ من سک باز دلپدرد آں ۔ مزن وزیر شہباز شریف ءَ سیلاب ءِ سبب ءَ بیران بوتگیں مردمانی ھوالگ ءَ پاکستان ءِ اُلس ءُ حکومت ءِ گوما ءُ وتی نیمگ ءَ ترکی ءِ صدر رجب طیب اردوان ءُ ترکی ءِ اُلس ءَ گوں دلپدردی ءِ درشانی کتگ۔ آئی ءَ گوشت کہ پاکستان اے غم ءِ ساھت ءَ وتی ترک برات ءُ گہار آنی گوما سرجمیں یکوئی ءِ درشان ءَ کنت، مئے دل ءِ جہلانکی ءَ چہ ھمدردی ءُ دعا آماچیں ھاندان ءِ گوما انت۔ آئی ءَ گوشت کہ پاکستان ترکی ءِ آماچیں دمگ آنی تہ ءَ کمک ءُ بحالی ءِ کار آنی تہ ءَ ھمک رنگ ءِ کمک ءِ واستہ تیار اِنت۔