بلوچستان ءِ سر وزیر،  راستی آنی رد ءَ رپورٹنگ پاکستان ءِ برجائی، دیمروئی ءُ روشنائیں آیوکیں باندات  ءِ  زامن اِنت، سر وزیر بلوچستان

کوئٹہ۔ 03 مئی (اے پی پی): بلوچستان ءِ سر وزیر میر سرفراز بگٹی ءَ گوشت کہ آزات، زمہ وار ءُ سرپدیں اھوالکاری کجام ھم جمہوری چاگرد ءِ بن ھشت اِنت ءُ پاکستان ءَ جمہوری استحکام، راجی یکوئی ءُ ریاستی مھکمی ءِ واستہ ایشی ءِ کرد المی اِنت۔ پریس ءِ آجوئی ءِ جھان ءِ روچ ءِ درگت ءَ وتی کلوہ ءِ تہ ءَ آئی ءَ گوشت کہ ذمہ واریں اھوالکاری پریس ءِ راستیں آجوئی ءِ بنکی لوٹ اِنت ایشی ءِ وسیلگ ءَ چاگرد ءِ تہ ءَ توازن، شفافیت ءُ احتساب ءِ دیمروئی بوت کنت۔ آئی ءَ گوشت کہ بلوچستان ءِ اھوالکار سک نگیگیں ءُ نگیگیں جاور آنی تہ ءَ وتی پیشہ وارانہ فرز ءَ پیلو کنگ ءَ انت کہ اے ستا کرز انت۔ آئی ءَ گوشت کہ ھما اھوالکار کہ راستی ءُ ایمانداری ءِ واستہ وتی سراں ندر کن اَنت آ ریاست ءِ شان اَنت ایشانی ندر کنگ کدی ھم بے سر نہ بنت۔ بنجاھی وزیر ءَ گوشت کہ حکومت مدام جوانیں ءُ جوڑیشت ءِ ایراد ءِ سر ءَ ھیال ءُ لیکہ کنت چیا کہ اے عمل نظام ءِ اصلاح ءُ گورننس ءِ گہتری ءِ یک موثریں وسیلگ جوڑ بیت۔ آئی ءَ راجی رسانکدر ءِ سر ءَ زور پر دات کہ آ ایوک ءَ کرائم نیوز ءَ گوں بندوک مہ بنت بلکیں چاگردی جیڈھ، دیمروئی ءِ گامگیج ءُ بلوچستان ءِ جوانیں تک ءُ پھنات آناں سرجمیں رنگ ءَ دیم ءَ بیار اَنت۔ میر سرفراز بگٹی ءَ گوشت کہ ڈیجیٹل دور ءَ ھال آنی پک کنگ ءُ حقیقت آنی سر ءَ رپورٹنگ اھوالکار آنی ھاسیں اخلاقی ذمہ واری انت۔ سوشل میڈیا ءِ سر ءَ منفی پروپیگنڈا ءِ گر ءُ دار ءِ واستہ بلوچستان ءِ اولی سوشل میڈیا پالیشی ءِ ھوالگ ءَ آئی ءَ گوشت کہ اے گامگیج ءِ مول ءُ مراد ذمہ وار ءُ مستندیں ھال آنی دیمروئی ءَ را دل یکیمی کنگ اِنت۔ آئی ءَ بیورو ءِ کارگس آنی بند کنگ ءُ میڈیا ہاؤس آنی نیمگ ءَ کارندہ آناں برطرف کنگ ءِ سر ءَ جیڈھ ءِ درشانی کنان ءَ اے گپ ءَ را پیمرا ءِ معاہدہ آنی ھلاپ ورزی لیک اتگ۔ بنجاھی وزیر ءَ توامیں پرائیویٹ ٹی وی چینلاں گوں دزبندی کتگ کہ آ بلوچستان ءَ وتی بیورو ءِ کارگساں کارآمد بہ کن اَنت، حکومت آھاں سرجمیں سیکورٹی ءُ ھمک رنگ ءِ کمک ءَ کنت۔ آئی ءَ اے جزم ءِ یک رندے پدا گوشت کہ پریس ءِ آجوئی، ذمہ واریں رپورٹنگ ءُ راستیں ھال پاکستان ءِ برجائی، دیمروئی ءُ رژنائیں آیوکیں وھد ءِ ضمانت اِنت۔