رسانکدر ءِ آجوئی پہ یک جان سلامتیں، سرپدیں ءُ ساپ ءُ سلہ ایں چاگردے ءَ المی اِنت، جعفر خان مندوخیل

کوئٹہ۔ 03 مئی (اے پی پی): گورنر بلوچستان جعفر خان مندوکھل ءَ گوشت کہ رسانکدر ءِ آجوئی یک آئین ءِ ھک ءُ جمہوری لوٹ اِنت، رسانکدر ءِ آجوئی یک جان سلامتی، سرپد ءُ انصاف ءِ چاگرد ءِ واستہ المی اِنت، رسانکدر ءِ آجوئی ھمیش اِنت۔ اے ھیالانی درشانی آئی ءَ جھان ءِ آجوئی ءِ روچ ءِ درگت ءَ یک کلوہ ءِ تہ ءَ کت اَنت۔ گورنر بلوچستان ءَ پاکستان ءُ سرجمیں دگنیا ءَ اھوالکار آنی گوما یکوئی ءِ درشان کنان ءَ گوشت کہ رسانکدر ءِ آجوئی آئینی ھک ءُ جمہوری لوٹ اِنت، نوکیں دگنیا ءِ تہ ءَ لبز ءِ آجوئی آکسیجن ءِ وڑ ءَ اِنت کہ ایشی ءِ ھست نہ بوھگ ءَ سرجمیں جمہوری نظام دم بُرت کن اَنت، رسانکدر ءِ آجوئی پہ یک جان سلامتی ءِ واستہ المی اِنت۔ آئی ءَ گوشت کہ زندمان ءِ ایندگر شوبگ آنی وڑ ءَ میڈیا ءَ را ھم ڈیجیٹلائزیشن ءِ نوکیں مارشت آنی گوما آشنای کنگ بوھگ ءَ انت، آزاتیں رسانکدر ءِ آجوئی گیش دست کپگ ءَ انت ءُ گیش حساس انت۔ آئی ءَ گوشت کہ ھال ءُ اکس نوں سوشل میڈیا ءِ وسیلگ ءَ یک دمانے ءَ لاکھوں مردم آنی گور ءَ سر بنت، اے ھر شعوری مردم ءِ اخلاقی فرض اِنت کہ آ بے تصدیقیں ھال ءُ جعلی ھال آنی شنگ ءُ تالان کنگ ءَ مہ کنت۔ گورنر ءَ گوشت کہ انچوش کہ شما سرپد اِت اھوالکاری ریاست ءِ چارمی بن پادگ اِنت، پارلیمنٹ کانود جوڑ کنت ءُ عدلیہ ایشی ءِ ترجمانی ءَ کنت، انتظامیہ کانود ءِ سر ءَ عملدرآمد کنت ءُ میڈیا حکومت ءُ الس ءِ نیام ءَ پُل ءِ کرد ءَ پیلو کنگ ءَ اِنت۔ جعفر خان مندوخیل ءَ گوشت کہ مرچی ما اھوالکاری ءِ شھید آناں، ھما بہادریں میڈیا ءِ مردم آناں یات پیش کن ایں کہ آھاں وتی ڈیوٹی ءِ وھد ءَ وتی جان ندر کتگ، ما مزنیں اھوالکار آنی ھزمت ءُ قربانی آناں ارزشت دئیں ءُ آھاں ھچبر شموشکار نہ بئیں، ایشی ءَ ابید ما شمئے اھوالکار آنی ھک ءُ روزگار ءِ رکھینگ ءَ را ھم دل یکیمی کن ایں ۔ آئی ءَ گوشت کہ نوں ما آرٹیفیشل انٹیلی جنس ءُ روبوٹ ٹیکنالوجی ءِ دور ءَ داخل بوھگ ءَ ایں، ما کاگد ءُ قلم ءِ دود ءُ ربیدگ ءَ چہ دیم ءَ شتگیں، اے نوکیں دور ءِ بندات اِنت، پمیشکا درستیں میڈیا پروفیشنل اے گپ ءَ دل ءَ بہ دار اَنت کہ ڈیجیٹل جرنلزم ءَ گوں رابطہ کنگ وھد ءِ لوٹ اِنت۔ پہ ایشی ءَ شما نوکیں ٹولزاں وتیگ بہ کن اِت، نوکیں ٹیکنالوجی ءِ سر ءَ مہارت بہ دار اِت، زانشتی نوکیں چیزاں گوں آشنا بہ بئے ءُ آھانی سر ءَ سرجمیں مہارت بہ زور اِت، اے وڑ ءَ شما وتی زانت ءُ تجربہ ءَ پہ وتی استان ءِ مردمانی شرتریں نپ ءُ سیتاں کارمرز کنگ ءِ وس ءَ بہ کن اِت۔