آزات ءُ ذمہ واریں رسانکدر جمہوری چاگرد ءِ المیں بن پادگ انت، سینیٹ ءِ چیئرمین سید یوسف رضا گیلانی

اسلام آباد۔3مئی  (اے پی پی): چیئرمین سینیٹ سید یوسف رضا گیلانی ءَ جھان ءِ پریس ءِ آجوئی ءِ روچ ءِ درگت ءَ راج ءَ را وتی کلوہ ءِ تہ ءَ گوشت کہ اے روچ جمہوری اقدار آنی سر ءَ کمٹم ءِ نوک کنگ ءِ روچ اِنت۔ سینیٹ سیکرٹریٹ ءِ نیمگ ءَ چہ جاڑی بوتگیں بیان ءِ تہ ءَ چیئرمین سینیٹ ءَ گوشت کہ آزات ءُ ذمہ واریں میڈیا جمہوری چاگرد ءِ المیں بن پادگ اِنت، اھوالکاری الس ءَ را مستندیں زانتکاری ءُ شفافیت ءِ پھجارینگ ءِ یک ھاسیں وسیلگ اِنت ءُ جمہوریت ءِ برجائی ءِ واستہ اھوالکار آنی رکھینگ ءُ آجوئی المی اِنت۔ سید یوسف رضا گیلانی ءَ گیش گوشت کہ پاکستان ءِ آئین ءَ لبز ءِ آجوئی ءُ آجوئیں اھوالکاری ءِ سرجمیں ضمانت داتگ، اھوالکارانی سر ءَ زوراکی ءُ آزار ءُ اھوال کنگ نا منّگ بیت۔ آئی ءَ گوشت کہ سینیٹ ءَ اھوالکار آنی ھک آنی رکھینگ ءَ مدام جوانیں کرد پیلو کتگ۔ چیئرمین سینیٹ ءَ گوشت کہ جعلی ھال ءُ اھوال ءُ پروپیگنڈا ءِ دور ءَ زمہ وار احوالکاری ءِ ارزشت گیش بوتگ۔ سید یوسف رضا گیلانی ءَ گوشت کہ رسانکدر ءَ راستی، پٹ ءُ پول ءُ توازن دیم ءَ برگ لوٹ ایت۔ آئی ءَ گوشت کہ پارلیمان  ءِ آزاتی  ءَ گوں درشان ءُ اھوالکار آنی آجوئی ءِ دیمروئی ءِ واستہ جزمیگ اِنت۔