صدر آصف علی زرداری پنچ روچی سرکاری تر ءُ تاب ءِ سرجم کنگ ءَ پد چین ءَ چہ پاکستان ءَ روادگ

اسلام آباد۔1مئی  (اے پی پی): صدر آصف علی زرداری ءَ پنچ روچی سرکاری تر ءُ تاب ءِ سرجم کنگ ءَ پد چین ءِ شہر سانیا ءَ چہ پاکستان ءَ شتگ۔ جمعہ ءِ روچ ءَ صدارت ءِ پریس ونگ ءِ نیمگ ءَ چہ جاڑی بوتگیں بیان ءِ رد ءَ صدر ءَ را چین ءِ کمیونسٹ پارٹی ہائینان ءِ مزنیں سروک وانگ کیانگ ءَ سانیا بالی پٹ ءَ یلہ داتگ۔ اے موہ ءِ سر ءَ پاکستان ءَ چین ءِ سفیر جیانگ زیڈونگ ءُ چین ءَ پاکستان ءِ سفیر خلیل ھاشمی ءُ چین ءِ دری کارانی وزارت ءِ مزنیں کارندہ ھم ساڑی بوتگ اَنت۔ صدر زرداری ءِ چین ءِ تر ءُ تاب ءِ ساھت ءَ ہونان ءُ ہینان ءَ صنعتی، کشت ءُ کشاری ءُ سمندری معیشت ءِ شوبگ ءَ کمک ءِ دیمروئی ءِ بابت ءَ گپ ءُ تران بوتگ۔ چین ءِ تر ءُ تاب ءِ وھد ءَ صدر ءِ مملکت ءَ چیئرمین ماؤ زے تونگ ءِ ھند شاؤشان ءِ تر ءُ تاب کتگ ءُ آئی ءَ را شگر ءُ منت گپتگ۔ سی پیک 2.0 ءِ چیر دستیءَ ملکی صنعتی دیمروئی ءُ نیلیں معیشت ءِ ھوالگ ءَ پیشرفت تر ءُ تاب ءِ مستریں دلگوشی بوتگ۔ چانگشا ءِ تر ءُ تاب ءِ ساھت ءَ دریا ءِ آپ ءِ شور کنگ، کشت ءُ کشاری ٹیکنالوجی ءُ چائے ءِ دیمروئی ءِ واستہ پاکستانی ءُ چینی ادارگ آنی نیام ءَ سئے تپاک  نامہ ءِ سر ءَ دستخط کنگ بوت۔ سانیا ءَ مشینری، جانور آنی ویکسین ءُ میڈیکل ٹیکنالوجی ءِ دیمروئی ءِ واستہ دو تپاک  نامہ ءُ صدر ءِ مملکت ءِ ھواری ءَ یکجائی سرمایہ کاری ءِ منوگری ءِ سر ءَ دستخط کنگ بوت۔ صدر ءِ مملکت ءَ چانگشا ءُ سانیا ءَ صوبائی تک ءِ پارٹی سروکی ءَ گوں سرجمیں ی گند ءُ نند کت۔ صدر آصف علی زرداری ءَ ھاسیں مہمان ءِ بستار ءَ سانیا ءَ پاک بحریہ ءِ اولی ہنگور کلاس آبدوز ءِ کار بندات کنگ ءِ مراگش ءَ ھم بھر زوری کت۔ صدر ءِ مملکت ءِ تر ءُ تاب پاکستان ءُ چین ءِ نیام ءَ سفارتی سیادی ءِ 75سال ءِ درگت ءَ کنگ بوت، ایشی ءِ تہ ءَ جتاجتائیں پڑ آنی تہ ءَ کمک ءَ را گیش پراھی کنگ ءِ ھوالگ ءَ گپ ءُ تران کنگ بوت۔