سائنس ءُ ٹیکنالوجی ءِ وفاقی وزیر خالد حسین مگسی ءَ یونیسیف ءِ مزن تک ءِ ڈل ءَ گوں گند ءُ نند

اسلام آباد۔1مئی  (اے پی پی): سائنس ءُ ٹیکنالوجی ءِ وفاقی وزیر خالد حسین مگسی ءَ یونیسیف ءِ مزن تک ءِ ڈل ءَ گوں گند ءُ نند کت۔ دیوان ءِ تہ ءَ ملک ءِ تہ ءَ مات ءُ زھگ آنی جان سلامتی ءِ سر ءَ سرب ءِ ھترناکیں اثر آنی سر ءَ سک باز جیڈھ ءِ درشانی کنگ بوتگ۔ وفاقی وزیر خالد مگسی ءَ اے موہ ءِ سر ءَ گوشت کہ سیسہ ءِ آلودگییک مزنیں جان سلامتی ءِ جیڈھ اِنت، ایشی ءَ چہ ھاسیں رنگ ءَ زھگ آنی ذھنی ءُ جسمانی دیمروئی ءَ را منفی اثر کپت کنت۔ آئی ءَ اے چیلنج ءِ گیواری ءِ واستہ موثر حکومتی حکمت عملی ءُ سختیں ریگولیٹری گامگیج آنی ترندیں ضلورت ءِ سر ءَ زور پر دات۔ دیوان ءَ پی سی ایس آئی آر کراچی ءَ نوکیں لیڈ فری ٹیسٹنگ لیبارٹری ءِ جوڑ کنگ ءِ تجویز ءِ سر ءَ سرجمی  ءَ ھیال ءُ لیکہ کنگ بوت، تانکہ صنعتی ءُ صارفین ءِ چیز آنی تہ ءَ لیڈ ءِ ھست بوھگ ءِ موثر ٹیسٹنگ ممکن بہ بیت۔ ایشی ءِ گوما لاہور، کوئٹہ ءُ پشاور ءَ اے لیبارٹری ءِ ذیلی مراکز جوڑ کنگ ءِ تجویز ءِ سرا ہم گپ ءُ تران کنگ بوت، دانکہ سرجمیں ملک ءَ اے آسراتی ءِ دستیابی ءَ را دل یکیمی کنگ بہ بیت۔ ایشی ءَ ابید پاکستان سٹینڈرڈز اینڈ کوالٹی کنٹرول اتھارٹی ءَ پینٹ، کاسمیٹکس ءُ وردن ءِ تہ ءَ لیڈ ءِ حد ءِ ھوالگ ءَ رھبند آناں گیش کنگ ءِ سر ءَ ھم ھیال ءُ لیکہ کتگ۔ دیوان ءَ اے گپ ءِ سر ءَ تپاک کنگ بوت کہ انسانی جان سلامتی ءِ واستہ ھترہ آناں کم کنگ ءِ واستہ صنعتی شوبگ ءَ لیڈ ءِ کارمردی ءِ جوانیں نگرانی المی اِنت۔ وفاقی وزیر ءَ اے گپ ءِ سر ءَ ھم زور پر دات کہ اے جیڈھ ءِ گیواری لس تک ءَ سرپدی پیداک کنگ ءَ ابید ممکن نہ اِنت۔ اے ھاتر ءَ پاکستان سائنس فاؤنڈیشن سرجمیں ملک ءَ سیسہ ءِ تاوان آنی بابت ءَ سرپدی ءِ سیمینار ءُ مہم بندات کنت، تانکہ شہری آناں اے ھترہ ءَ چہ وت ءَ را رکھینگ ءِ راہ آنی بابت ءَ سرپد کنگ بہ بیت۔ گند ءُ نند ءِ گڈ ءَ وفاقی وزیر ءَ اے دیمروئی ءَ را پاکستان ءِ واستہ لیڈ فری ءُ ایمنیں آیوکیں وھد ءِ نیمگ ءَ یک ھاسیں سنگ میل ءِ رنگ ءَ لیک اتگ ءُ گوشت کہ اے چیلنج ءِ جوانیں گیواری حکومت، میاں اوستمانی ادارگ ءُ سائنسی گل آنی کمک ءَ گوں شوھازگ بوت کنت۔