پاکستان ءِ وتی حاکمیت ءِ دیمپانی ، سمندری مفاد ءِ رکھینگ ، ءُ وتی اقتصادی راہداری آنی ایمنی ءَ را دل یکیمی کنگ ءِ سرجمیں صلاحیت است انت ، صدر آصف علی زرداری اولی ہنگور کلاس آبدوز ءِ کمیشننگ ءِ مراگش ءَ گوں تران

راولپنڈی۔30اپریل  (اے پی پی): صدر آصف علی زرداری ءَ یک رندے پدا گوشت کہ پاکستان یک مھکم، متوازن ءُ معتبریں دیمپانیی صلاحیت ءِ برجائی ءِ واستہ جزمیگ انت۔ پاکستان ءِ وتی حاکمیت ءِ دیمپانی ، دریائی مفادات ءِ رکھینگ ءُ وتی اقتصادی راہداری آنی ایمنی ءَ را دل یکیمی کنگ ءِ سرجمیں صلاحیت است انت۔ آئی ءَ اے گپ چینمی ءِ شہر سنات ءَ اولی ہنگور کلاس آبدوز پی این ایس/ایم ہنگور  ءِ کمیشننگ مراگش ءَ گوں تران کنان ءَ کت۔ مراگش برجم دارگ بوت۔ پنچ شمبے ءِ روچ ءَ آئی ایس پی آر ءِ نیمگ ءَ جاڑی بوتگیں بیان ءِ رد ءَ مراگش ءَ ھاسیں مہمان ءِ بستار ءَ صدر آصف علی زرداری ءَ شریک بوتگ، وھدیکہ اے موہ ءِ سر ءَ چیف آف نیول اسٹاف ایڈمرل نوید اشرف ھم ساڑی بوتگ۔ صدر آصف علی زرداری ءَ ہنگور ءِ بندات ءَ را پاک بحریہ ءِ نوکیں رنگ ءَ سنگ میل لیکگ ءَ پاکستان ءِ یک مھکمیں، متوازن ءُ معتبریں دیمپانیی اُرد ءِ برجائی ءِ جزم ءِ یک رندے پدا گوشت۔ آئی ءَ گوشت کہ پاکستان وتی وت واجہی ءِ رکھینگ، وتی دریائی نپ آنی رکھینگ ءُ وتی اقتصادی راہداری آنی ایمنی ءَ را دل یکیمی کنگ ءِ سرجمیں توان ءَ دار ایت۔ نیول اسٹاف ءِ سروک ءَ گوشت کہ کلیدی دریائی لین آنی تہ ءَ ھرابکاری ءِ سبب ءَ جھان ءِ تجارت ءُ توانائی ءِ ایمنی ءِ واستہ گیش بوھوکیں ھترہ اِنت ءُ نوکیں ٹیکنالوجی ءِ وسیلگ ءَ توانمند بوھوکیں نیول فورسز یک مھکم ءُ اصول آنی سر ءَ بنیات ءِ سر ءَ دریائی رھبند ءِ جوڑ کنگ ءِ واستہ المی اَنت۔ آئی ءَ گوشت کہ نوکیں سلاہ، نوکیں سینسر ءُ ھوا ءَ چہ آزاتیں پروپلژن ءَ گوں لیسیں ھنگور کلاس ءِ آبدوز دمگ ءَ دریائی استحکام ءُ امن ءِ برجائی ءِ تہ ءَ المی کرد پیلو کن اَنت۔ اے آبدوز عرب ءِ بحیرہ ءُ ہند ءِ جہان ءِ تہا ھاسیں دریائی لینانی رکھینگ ءُ جارحیت ءِ دیم ءَ دارگ ءِ تہا ھاسیں کرد پیلو کن انت۔ نیول چیف ءَ اے گپ ءِ سر ءَ ھم زور پر دات کہ "ھنگور” ءِ نام مئے راجی راجدپتر ءِ تہ ءَ یک مزنیں جاھے ءِ واھند اِنت۔ 1971 ءَ پیسریگیں ہنگور آبدوز ءَ دومی جھان جنگ ءَ پد اولی رند ءَ جنگی جہاز ڈوب داتگ۔ پی این ایس / ایم ہنگور اے شانداریں روایت ءَ را دیم ءَ برگ ءَ انت ءُ پاک بحریہ ءِ واستہ سنگ میل انت ایشی ءَ چہ مئے بحریہ ءِ دیمپانیی صلاحیت ءَ را مھکم کنگ ءُ نوکیں ٹیکنالوجی ءَ چہ لیس کنگ بیت۔ اولی ہنگور کلاس آبدوز ءِ کار بندات کنگ پاکستان ءُ چین ءِ نیام ءَ دیریں ءُ مھکمیں دوستی ءِ دگہ باب اِنت۔ مراگش ءَ پاک بحریہ ءُ پی ایل اے ءِ مزن مزنیں کارندہ آں بہر زرتگ۔ مزن وزیر محمد شہباز شریف ءُ چیف آف آرمی اسٹاف ءُ چیف آف ڈیفنس فورسز صادق عاصم منرا ءَ سرجمیں راج ءُ پاک بحریہ ءَ را اے شانداریں سوبمندی ءِ سرا مبارکی دات۔