پاکستان ءَ جان سلامتی ءُ دوا ءُ درمان ءِ شوبگ ءَ یک ھاسیں سنگ میل ءِ سرا چہ دیم ءَ شتگ، سید مصطفی کمال

اسلام آباد۔30اپریل  (اے پی پی): وفاقی وزیر برائے راجی جان سلامتی سید مصطفیٰ کمال ءَ گوشت کہ پاکستان ءَ جان سلامتی ءُ دوائی آنی شوبگ ءَ یک ھاسیں سنگ ءَ چہ گوستگ۔ پاکستان ءِ منشیات ءِ ریگولیٹری اتھارٹی ءِ مرکزی منشیات لیبارٹری ءَ را ورلڈ ہیلتھ آرگنائزیشن ءِ نیمگ ءَ چہ پری کوالیفکیشن رستگ ایشی ءَ چہ ملک ءِ دوائی آنی کوالٹی ءُ جھان ءِ ساکھ ءَ را مزنیں کساسے ءَ گیشی بیت۔ پنچ شمبے ءِ روچ ءَ پریس کانفرنس ءَ گوں گشتانک دیان ءَ آئی ءَ گوشت کہ اے سرٹیفکیشن ءِ گرگ ءَ چہ پاکستان ءِ دوائی آنی برآمد کنگ ءَ را مزنیں دیمروئی رسیت۔ نوں پاکستانی دوائی آنی ریگولیٹری چکاس ءَ را مزنیں کساسے ءَ کم کنگ بیت ایشی ءِ آسر ءَ دستاویزات ءِ لوٹ کم بنت ءُ برآمد کنوک آنی واستہ تجارتی عمل آسان بنت۔ آئی ءَ گوشت کہ اے پروموشن ءَ پاکستان ءَ را ورلڈ ہیلتھ آرگنائزیشن ءِ لیول تھری ریگولیٹری ءِ درجہ ءِ سر بوھگ ءِ نزیک ءَ آؤرتگ۔ اے وھد ءَ پاکستان ڈبلیو ایچ او لیول 2 ءَ اِنت بلے آیوکیں 6 تاں 8 ماہ ءَ لیول 3 ءَ سر بوھگ ءِ گمان اِنت۔ لیول تھری ءِ درجہ ءِ گرگ ءَ پد پاکستان ءِ دوائی آنی برآمدات ءِ تہ ءَ گیشی ءِ گمان اِنت۔ اے وھد ءَ پاکستان ءِ نیمگ ءَ چہ نزیک ءَ 51 ملک آنی تہ ءَ دوائی برآمد کنگ بوھگ ءَ اِنت بلے لیول تھری سرٹیفیکیشن ءِ گرگ ءَ پد اے کساس 150ملک آنی تہ ءَ سر بوت کنت۔ اے وھد ءَ ریگولیٹری لوٹ آنی پیلو نہ کنگ ءِ سبب ءَ نزیک ءَ 100 ملک آنی تہ ءَ پاکستانی درمان آنی رسگ ممکن نہ بوتگ۔ آئی ءَ گوشت کہ پاکستان ءَ دوائی، مہارت ءُ جوڑ کنگ ءِ گنجائش ءِ ھچ وڑیں کمی نہ بوتگ، البت میاں اوستمانی سرٹیفیکیشن ءِ نہ بوھگ یک مزنیں رکاوٹ ات، ایشی ءَ چہ نوں گر ءُ دار کنگ بوھگ ءَ انت۔ دومی نیمگ ءَ وفاقی کابینہ ءَ پاکستان ءِ راجدپتر ءَ اولی رند ءَ لوکل ویکسین جوڑ کنگ ءِ واستہ راجی ویکسین پالیشی ءِ منظوری داتگ۔ اے پالیشی ءَ چہ نہ ایوک ءَ بنجاہی تک ءَ ویکسین ءِ دیمروئی ءَ را دیم ءَ برگ بیت بلکینگ ءَ درملکی سرمایہ کاری ءِ واستہ نوکیں موہ ھم پیداک بنت۔ آئی ءَ گوشت کہ کجام ھم ملک ءَ ویکسین ءِ دیمروئی ءِ واستہ ھاسیں پالیشی ءِ دارگ سک باز المی انت ءُ پاکستان نوں اے کمی ءَ را منظم رنگ ءَ پُر کنت۔ اے دوئیں گامگیج پاکستان ءِ جان سلامتی ءِ نظام ءُ دوا ءُ درمان ءِ صنعت ءِ واستہ گیم چینجر ثابت بوت کن انت ءُ ملک ءَ را جھان ءِ مارکیٹ ءَ مھکمیں پوزیشن ءِ جوڑ کنگ ءَ کمک رسیت۔