جانوراں گوں ظلم ءِ گر ءُ دار ءِ کمیٹی ءِ اولی دیوان، جنگلی زند ءِ رکھینگ ءِ ھوالگ ءَ چیلنج آنی سر ءَ گپ ءُ تران

اسلام آباد۔29اپریل  (اے پی پی): موسمیاتی بدلی ءُ چاگردی یکوئی  ءِ وفاقی وزیر ڈاکٹر مصدق ملک ءَ جانور آنی سر ءَ ظلم ءِ گر ءُ دار ءِ کمیٹی ءِ اولی دیوان ءِ سروکی ءَ کت کہ ایشی ءِ تہ ءَ مزن وزیر محمد شہباز شریف ءِ ہدایت ءِ سر ءَ جوڑ بوتگیں کمیٹی ءِ اولی دیوان ءِ سروکی کنگ بوت۔ وزارت ءِ نیمگ ءَ چہ جاڑی بوتگیں بیان ءِ رد ءَ اے کمیٹی ءِ مول ءُ مراد پاکستان ءَ جانور آنی وشھالی ءِ دیمروئی ءِ واستہ یک سرجمیں فریم ورک ءِ جوڑ کنگ، جانور آنی سر ءَ زلم ءُ زوراکی ءِ واکیہ آناں چار ءُ تپاسی کنگ ءُ آھانی گر ءُ دار ءِ واستہ جوانیں گامگیج آنی سوج دیگ اِنت۔ کمیٹی ءَ را قانونی فریم ورک ءِ چار ءُ تپاسی ءُ ایشی ءَ را گیش موثر جوڑ کنگ ءِ ذمہ واری ھم داتگ، نگرانی ءُ نفاذ ءِ نظام ءَ را مھکم کنگ ءِ ھاتر ءَ جنگلی زند ءِ ناجائزیں سوداگری ءِ گر ءُ دار ءِ ھاتر ءَ ءُ ایشی ءَ گوں سیادی داروکیں آسراتی آنی تہ ءَ اصلاحات کنگ ءِ ذمہ واری ھم داتگ۔ اے رد ءَ ادارہانی نیام ءَ نزوریں یکوئی ، اختیارات ءِ یکے دومی ءِ سرا کپگ، جانور ءِ سرا ظلم ءِ بابت ءَ استیں قانود ءِ تہا نزوریں سزا، استیں قانود ءِ نادراھی ءِ نفاذ، مرکزی نگرانی ءُ رپورٹنگ ءِ نظام ءِ کمی، مالی ءُ انسانی منابع ءِ کمی ءُ لس مھلوک ءِ سرپدی ءِ کمی ھوار انت۔ کمیٹی ءَ را سرپد کنگ بوت کہ پاکستان جنگلی زندمان ءِ ناجائزیں وڑے ءَ سوداگری ءِ ھوالگ ءَ یک حساسیں ملکے، ایشی ءِ تہ ءَ فالکن، وشیں آپ ءِ کچھو، شیر، مگرب، پرندگ ءُ مینڈک ءِ ھواریں جتا جتائیں نسل آنی ناجائزیں رنگ ءَ سوداگری کنگ بیت۔ دیوان ءَ سرپد کنگ بوت کہ کیپیٹل ڈویلپمنٹ اتھارٹی ءُ میٹروپولیٹن کارپوریشن اسلام آباد ءَ اسلام آباد ءِ جتا جتائیں شوبگ آنی تہ ءَ آوارہ سگ آنی انسانی انتظامی ءِ واستہ ٹی این وی آر (ٹریپنگ، سٹرلائزیشن، ویکسینیشن اینڈ ری ریلیز) مہم بندات کتگ۔ چہ ایشی ءَ ابید رضاکارانی یک نظامے ھم پیسر ءَ چہ ھست کہ آ اے جانوراں ورگ ءُ چار ءُ بچار کنگ ءَ کمک بہ کن اَنت۔ البت اے گامگیجاں جوانیں رنگے ءَ دیم ءَ برگ ءِ ھاترا گیشتر رضاکار ءُ یک مھکمیں انتظامی ڈھانچے ءِ ضلورت اِنت۔ دیوان ءَ ناجائزیں جانور جنگ ءِ کیمپ، پبلسٹی ءُ مقبولیت ءِ ھاتر ءَ سوشل میڈیا ءِ سر ءَ زوراکی ءِ ویڈیو جوڑ کنگ ءُ شنگ کنگ ءِ رجحان ءُ چاگردی دود ءُ ربیدگ ءِ سر ءَ ھم جیڑہ ءِ درشانی کنگ بوتگ کہ جانور آناں رنج ءُ گم ءِ آماچ کن اَنت۔ ڈاکٹر مصدق ملک ءَ ہدایت کت کہ آیوکیں دیوان ءَ پیسر نہ ایوک ءَ اسلام آباد ءَ چہ بلکیں درستیں صوبہ آں چہ بنجاہی ڈیٹا جم کنگ بہ بیت تانکہ جیڈھ ءِ شدت ءِ درستیں اندازہ کنگ بہ بیت۔ آئی ءَ ہدایت کت کہ نس بندی ءُ ویکسینیشن پروگرام آنی واستہ لوٹوکیں آسراتی ءُ مالی وسیلگ آنی اندازہ کنگ بہ بیت ءُ راجی تک ءَ اے گامگیج آناں گیش کنگ ءِ واستہ سفارشات جوڑ کنگ بہ بنت۔ وفاقی وزیر ءَ اے گپ ءِ سر ءَ زور پر دات کہ جانور آنی سر ءَ زلم ءُ زوراکی انسانیت ءِ اصول آنی ھلاپ اِنت۔ آئی ءَ ہدایت کت کہ استیں کانودی فریم ورک ءِ یک جامع جائزہ ءِ کنگ بہ بیت تانکہ ہما خلاء ءِ پجارینگ بہ بیت کہ اودا جانور آنی سرا ظلم ءُ جنگلی زند ءِ جرم آنی سرا جوانیں رنگ ءَ سزا دیگ نہ بیت یا آہانی سرا جوانیں رنگ ءَ عمل درآمد کنگ نہ بوہگ ءَ انت۔ وفاقی وزیر ءَ گوشت کہ بدبھتی ءَ چہ آوارہ سگ آناں نس بندی ءُ ویکسین کنگ ءَ پد ھم بازیں کمیونٹیز آھاں وتی دمگ آنی تہ ءَ واتر بوھگ ءِ اجازت نہ دنت کہ ایشی ءَ چہ اے گپ پدر اِنت کہ الس ءِ سرپدی ناگزیر اِنت۔ آئی ءَ گیش ہدایت کت کہ جانور آنی رکھینگ ءِ پڑ ءَ کار کنوکیں کارکن ءُ ماہرین آناں یکجا کنگ بہ بیت تانکہ آہانی ھیال ءُ لیکہ پالیسی جوڑ کنگ ءِ تہ ءَ ھوار کنگ بہ بنت۔ ڈاکٹر مصدق ملک ءَ صوبائی حکومت آناں ھمراہ داری ءِ سر ءَ زور پر دیان ءَ گوشت کہ بامردیں دیمروئی ایوک ءَ وت مہ وتی کمک ءِ وسیلگ ءَ ممکن اِنت۔ دیوان ءَ موسمیاتی بدلی ءُ چاگردی یکوئی  ءِ وزارت، داخلہ ءِ وزارت، میٹروپولیٹن کارپوریشن اسلام آباد، زالبولانی جاور ھال ءِ نیشنل کمیشن، ءُ سول سوسائٹی ءُ جانور آنی رکھینگ ءِ شوبگ آنی نمائندگ آنی بھر زوری بوتگ۔