صدر آصف علی زرداری ءَ چین ءِ سرمایہ کار آناں پاکستان ءِ ترجیحی شوبگ آنی تہ ءَ سرمایہ کاری ءَ را گیش کنگ ءِ دعوت داتگ

سانیا۔29اپریل  (اے پی پی): صدر آصف علی زرداری ءَ چین ءِ تر ءُ تاب ءِ ساھت ءَ ہانگژو جن جیانگ گروپ  ءِ  سی ای او وانگ جیان  ءَ گوں گند ءُ نند کتگ ءُ پاکستان ءَ متبادل توانائی، آپ ءِ صفائی ءُ الیکٹرک گاڑی ءِ بیٹری سسٹم ءَ ھوار اولی ترجی ءِ شوبگ آنی تہ ءَ چینی سرمایہ کاری ءَ را گیش کنگ ءِ دعوت داتگ۔ صدر ءِ پریس ونگ ءِ نیمگ ءَ جاڑی بوتگیں بیان ءِ رد ءَ گند ءُ نند ءِ ساھت ءَ صدر ءِ مملکت ءَ را گوشگ بوت کہ اے گروپ پیسر ءَ چہ پاکستان ءَ بازیں منصوبگ آنی سر ءَ کار کنگ ءَ انت ءُ چین ءِ ٹاپ 100 کاروباری گروپ آنی تہ ءَ ھوار انت۔ ایشی ءِ کار ءُ کرد بھاری صنعت، کھاد، تیل ءُ گیس، کوئلہ ءِ گیسی فکیشن ، قابل تجدید توانائی، کشت ءُ کشاری ءُ آبپاشی ءِ وڑیں شوبگ آنی تہ ءَ ھوار اَنت۔ صدر ءِ مملکت ءَ گوشت کہ پاکستان جتاجتائیں شوبگ آنی تہ ءَ ھاسیں رنگ ءَ واٹر ٹریٹمنٹ، الیکٹرک گاڑی ءِ بیٹری سسٹم ءُ متبادل توانائی ءِ تہ ءَ درملکی سرمایہ کاری ءِ سک باز دلبڈی کنگ ءَ اِنت۔ آئی ءَ گوشت کہ اے رنگیں شریک داری برجائی ءِ دیمروئی ءُ صنعتی دیمروئی ءِ تہ ءَ کمکار بوت کنت۔ صدر آصف علی زرداری ءَ گوشت کہ سندھ حکومت صوبگ ءَ سرمایہ کاری کنوکیں درملکی کمپنی آناں ھاسیں رنگ ءَ سرکاری ءُ نجی شریکداری ءِ تہ ءَ ھمک رنگ ءِ آسراتی پجارین ایت۔ گند ءُ نند ءَ سینیٹر سلیم مندوی والا، سندھ ءِ مزنیں وزیر شرجیل انعم میمن، سرمایہ کاری ءُ سرکاری ءُ نجی شریکداری ءِ منصوبگ آنی ھوالگ ءَ سر وزیر سندھ ءِ ھاسیں کمکار سید قاسم نوید قمر ءُ چیف سیکرٹری سندھ ءَ ھم بھر زوری کتگ۔