پاکستان ءِ راجدپتر ءَ اولی رند ءَ ویکسین ءِ  تیاری ءِ واستہ یک سرجمیں راجی پالیسی ءِ منظوری ءِ ھاتر ءَ بنجاہی تک ءَ کنگ بوتگ، سید  مصطفیٰ کمال

اسلام آباد۔29اپریل  (اے پی پی): راجی جان سلامتی ءِ وفاقی وزیر سید  ڈاکٹر مصطفیٰ کمال ءَ گوشت کہ پاکستان ءِ راجدپتر ءَ اولی رند ءَ ویکسین ءِ  تیاری ءِ واستہ یک سرجمیں راجی پالیسی ءِ بنجاہی تک ءَ منظوری دیگ بوتگ۔ وزارت ءِ جان سلامتی ءِ نیمگ ءَ چہ جاڑی بوتگیں بیان ءِ رد ءَ چار شمبے ءِ روچ ءَ وفاقی کابینہ ءَ اے ھاسیں پالیسی ءِ باقاعدہ منظوری داتگ کہ اے ملک ءَ جان سلامتی ءِ نظام ءِ مھکم کنگ ءِ نیمگ ءَ سنگ میل ءِ رنگ ءَ ثابت بیت۔ وفاقی جان سلامتی ءِ وزیر ءَ گوشت کہ گوستگیں وھد ءَ پاکستان ءَ زنا ءِ نادراھی آنی ھوالگ ءَ ھچ وڑیں سرجمیں راجی پالیسی نہ بوتگ ایشی ءِ سبب ءَ اے شوبگ ءَ یکجاھیں پیشرفت ممکن نہ بوتگ۔ آئی ءَ گوشت کہ یک مھکمیں ءُ برجائی ءِ نظام ءِ جوڑ کنگ ءِ واستہ وزارت جان سلامتی ءَ اے پالیسی دستاویز توامیں سیادی داروک آنی گوما شور ءُ سلاھ ءَ تیار کتگ۔ آئی ءَ گوشت کہ اے پالیشی ءِ جوڑ کنگ ءَ صنعت ءُ پیداوار برائے اسپیشل اسسٹنٹ ہارون اختر، جان سلامتی ءِ وزیر مملکت مختار بھرتھ ءُ پاکستان ءِ ڈرگ ریگولیٹری اتھارٹی ءِ ھاسیں کرد ءِ بوتگ۔ آئی ءَ گوشت کہ ملک ءَ بنجاہی تک ءِ ویکسینیشن ءِ ضلورت وھد ءِ زوتیں ضلورت ات ءُ اے پالیشی اے ضلورت ءِ پیلو کنگ ءِ واستہ پائدگ مندیں گامگیج انت۔ وزیر جان سلامتی ءَ اے گامگیج ءَ را راجی وت واجہی ءِ نیمگ ءَ یک ھاسیں سنگ میل لیک اتگ ءُ گوشت کہ ایشی ءَ چہ نہ ایوک ءَ ویکسین ءِ دستیابی ءَ را گہتر کنگ بیت بلکیں آیوکیں جان سلامتی ءِ ایمرجنسی ءَ گوں جوانیں رنگ ءَ گر ءُ چیل بوھگ ءِ گنجائش ءَ را ھم گیش کنگ بیت۔