صدر آصف علی زرداری ءَ چین ءِ سروک ماؤ زے تنگ ءِ ھند شاؤشان ءِ تر ءُ تاب کتگ ءُ چیئرمین ماؤ ءِ ادیرہ ءِ دیم ءَ گلدستہ ایر کت

شاؤشان۔28اپریل  (اے پی پی): صدر آصف علی زرداری ءَ چین ءِ چیئرمین ماؤ زے تنگ ءِ ھند شاؤشان ءِ تر ءُ تاب کتگ ءُ اسٹیچو اسکوائر ءَ چیئرمین ماؤ ءِ ادیرہ ءِ کش ءَ گلدستگ ایر کتگ ءُ چین ءِ آشوبی سروک ءَ را شگر ءُ منت گپتگ۔ سئے شمبے ءِ روچ ءَ صدارت ءِ پریس ونگ ءِ نیمگ ءَ جاڑی بوتگیں بیان ءِ رد ءَ صدر ءِ مملکت ءَ پارٹی ءِ سینئر رہشون لی جیانگ ءُ ڈائریکٹر شاوشان انتظامیہ ژانگ شیہوئی ءَ وش اتک کتگ۔ آہاں صدر ءَ را چیئرمین ماؤ زے تنگ ءِ زند ءُ کوشست ءِ بابت ءَ سرپدی دات ءُ شاوشان ءَ آئی ءِ بنداتی سال ءُ آئی ءِ سیاسی سوچ ءِ جوڑ کنوکیں چیز آنی بابت ءَ رژنائی شنگ کت۔ صدر ءَ را راجدپتری مواد ءِ رکھینگ ءُ چین ءِ آشوبی راجدپتر ءِ بابت ءَ الس ءِ سرپدی ءَ را گیش کنگ ءِ تہ ءَ اے وڑیں یادگاری ادارگ آنی ھاسیں کرد ءِ بابت ءَ ھم سرپدی دیگ بوت۔ ادیرہ ءِ میدان ءَ مراگش ءَ پد صدر ءِ مملکت ءَ ماؤ زے تنگ میموریل میوزیم ءِ تر ءُ تاب کت کہ اودا آئی ءَ را چین ءِ راج دپتر ءِ بُن ھشت ایر کنوکیں سروک ءِ زند، پگر ءُ سیاسی میراث ءِ بابت ءَ سرپدی دیگ بوت۔ آئی ءَ چین ءِ آشوبی راجدپتر ءِ ھاسیں پڑانی درشان کنوکیں راجدپتری نمونہ، ریکارڈ ءُ اکس چار اِت اَنت۔ صدر آصف علی زرداری ءَ چین ءِ راجدپتری بدلی ءِ تہ ءَ چیئرمین ماؤ زے تنگ ءِ کرد ءَ را ستا کرتگ ءُ چین ءِ راج دپتر ءِ جہد، یکوئی ءُ دیمروئی ءِ تہ ءَ آئی ءِ کرد ءِ ساڑاتگ بوتگ۔ آئی ءَ گوشت کہ اے رنگیں جاھ آنی رکھینگ ءَ چہ ھما چیز آناں سرپد بوھگ ءَ کمک رسیت کہ آھاں نوکیں چین ءِ جوڑیشت ءِ تہ ءَ کرد پیلو کتگ ءُ راجی دیمروئی ءِ تہ ءَ راجدپتری شعور ءِ ارزشت ءَ را پدر کنت۔ صدر ءِ مملکت ءَ گوں سینیٹر سلیم منڈوی والا، سندھ ءِ مزنیں وزیر شرجیل انعام  میمن، علی حسن بروہی، سرمایہ کاری ءُ سرکاری پبلک پرائیویٹ پارٹنرشپ پراجیکٹس سید قاسم نوید قمر، چیف سیکرٹری سندھ، پاکستان   ءَ  چین کے سفیر جیانگ زائی دونگ  ءَ ھوار چین ءَ پاکستان ءِ سفیر خلیل ھاشمی ءُ دگہ بازیں مردماں ھوار اَتنت۔