راجی ورنا آنی روزگار ءِ پالیشی ءِ رد ءَ جتا جتائیں شوبگ آنی تہ ءَ کم چہ کم 35درسد زالبول آنی بھر زوری ءَ را دل یکیمی کنگ بیت، رانا مشہود احمد خان

اسلام آباد۔28اپریل  (اے پی پی): چیئرمین مزن وزیر ءِ ورنا پروگرام رانا مشہود احمد خان ءَ گوشت کہ راجی ورنا آنی روزگار ءِ پالیشی ءِ رد ءَ جتا جتائیں شوبگ آنی تہ ءَ کم چہ کم 35درسد زالبول آنی بھر زوری ءَ را دل یکیمی کنگ بیت، ءُ مزن وزیر ءِ بزنس یوتھ ءِ تہ ءَ زالبول آنی واستہ 25درسد کوٹہ ایر کنگ بوتگ۔ آئی ءَ اے ھیالانی درشانی سئے شمبے ءِ روچ ءَ ایس آئی اے سروک دیوان 2.0 ءَ ھاسیں مہمان ءِ بستار ءَ گشتانک دیان ءَ کت۔ سروک دیوان ءِ سرھال ”پاکستان ءَ زالبول آنی سروکی ءَ چاگردی کاروباری نظام ءِ جوڑ کنگ“ بوتگ ءُ ایشی ءِ تہ ءَ جتا جتائیں شوبگ آنی مردماں بھر زرتگ۔ چیئرمین مزن وزیر ءِ ورنا پروگرام ءَ وتی گشتانک ءِ تہ ءَ سوشل انوویشن اکیڈمی ءُ ایشی ءِ شریک داروک آنی کوشست آناں ساڑات ءُ بی پی ایف، اقوام متحدہ ءِ زالبول، او جی ڈی سی ایل ءُ ایندگر ادارگ آنی کوشست آناں ساڑات۔ آئی ءَ پاکستان ءِ اقتصادی دیمروئی ءِ تہ ءَ ورنا ھاسیں رنگ ءَ زالبول آنی ھاسیں کرد ءِ سر ءَ زور پر دات ءُ گوشت کہ اے پلیٹ فارم زالبول آنی سروکی ءَ گامگیج آنی دیمروئی ءُ چاگردی گہتری ءِ واستہ سک باز المی اِنت۔ آئی ءَ گوشت کہ پاکستان اے وھد ءَ دیمروئی ءِ یک المی ئیں پڑ ءَ انت ءُ جھان ءِ پڑ ءَ پدا وتی جاگہ ​​ءَ پچ گرگ ءَ انت، وھد اتکگ کہ پاکستان ءِ ورنا ھاسیں رنگ ءَ زالبول دیم ءَ بیا انت ءُ اقتصادی دیمروئی ءَ وتی کرد ءَ پیلو بہ کن انت۔ رانا مشہود احمد خان ءَ وتی پیسریگیں تجربت آنی بابت ءَ گپ جنان ءَ گوشت کہ آ ھما وھد ءَ زالبول آناں بااختیار کنگ ءِ منصوبگ آنی بھر بوتگ ھما وھد ءَ کہ مزن وزیر شہباز شریف پنجاب ءِ سر وزیر بوتگ۔ آئی ءَ گوشت کہ اے گامگیج آں صوبگ ءِ تہ زالبول آنی بھر زوری ءَ را گیش کنگ ءَ مزنیں کرد پیلو کتگ۔ آئی ءَ اے گپ ءِ سر ءَ زور پر دات کہ ورنا ءُ زالبول آناں بااختیار جوڑ کنگ پاکستان ءِ اقتصادی حکمت عملی ءِ بنیاتی بھر اِنت۔ جھان ءِ درور دیم ءَ آرگ ءَ آئی ءَ گوشت کہ زالبول آناں وھد ءِ گیش ءَ چہ گیش موہ دیگ بنت گڈا ملک ءِ معیشت ءَ مزنیں گہتری کیت۔ چوناھا انڈونیشیا ءَ وھدے زالبولاں 50 درسد نمائندگی دیگ بوت گڑا آئی ءِ جی ڈی پی 4 درسد گیش بوت ءُ نوں پاکستان ھم اے نیمگ ءَ جُنزگی اِنت۔ آئی ءَ جار جتگ کہ پاکستان ءِ اولی راجی ورنا روزگار ءِ پالیشی وفاقی کابینہ ءِ نیمگ ءَ منظور کنگ بوتگ ءُ زوت ایشی ءَ را بنگیج کنگ بیت۔ اے پالیشی ءِ رد ءَ جتاجتائیں شوبگ آنی تہ ءَ کم چہ کم 35درسد زالبول آنی بھر زوری ءَ را دل یکیمی کنگ بیت۔ ایشی ءَ ابید مزن وزیر ءِ ورنا کاروبار ءُ کشت ءُ کشاری وام سکیم ءَ زالبول آنی واستہ 25درسد کوٹہ ایر کنگ بوتگ۔ ایشی ءِ جوانیں آسر پنجاب ءُ سندھ ءَ درآہگ ءَ انت البت دگہ صوبگاں گیش کار کنگ لوٹیت۔ زالبولانی کمک ءِ ھاترا حکومت ھاسیں آسراتی ءِ مراگش جوڑ کنگ ءَ اِنت کہ اودا زالبول یکجاہ کار بہ کن اَنت، نوکیں ھیال ءُ لیکہاں دیم ءَ برگ ءُ وتی کاروبار بندات بہ کن اَنت۔ آئی ءَ وتی جزم ءِ درشان کت کہ حکومت یک انچیں نظام ءِ جوڑ کنگ ءِ واستہ جزمیگ انت کہ ایشی ءِ تہا ورنا ءُ زالبول دیمروئی بہ کن انت ءُ پاکستان ءِ وشحالی ءِ تہا وتی کرد ءَ پیلو بہ کن انت۔