چہ بلوچستان ءِ دود ءُ ربیدگ ءِ محکمہ ءَ سئے ازمکار جرمنی ءُ ہالینڈ ءَ  وتی ازم  پیش دار اَنت

کوئٹہ۔ 28 اپریل (اے پی پی): بلوچستان حکومت ءِ دود ءُ ربیدگ ءِ محکمہ ءَ ضلع ڈیرہ بگٹی ءَ چہ سئے باصلاحیتیں ازمکاراں یک ماہے ءِ واستہ جرمنی ءُ ہالینڈ ءَ روان دیگ ءِ بندوبست کتگ کہ اودا آ بلوچی روایتی ساز "نڑ  سُر” ءِ  وشیں الہان آں  پیش کن انت۔ کارمستر کلچر بلوچستان داؤد ترین ءِ رد ءَ اے گامگیج بلوچستان ءِ کوھن ءُ بے دروریں دود ءُ ربیدگ ءِ پڑ ءَ دگنیا ءَ پجارینگ ءِ ھاسیں کوشست اِنت۔ یورپ ءِ جتاجتائیں دود ءُ ربیدگی پروگرام ءُ مراگشاں بہر زورگ ءَ پیشگالیں ازمکار نہ ایوک ءَ وتی ازم ءِ دیم ءَ آرگ ءَ انت بلکیں پاکستان ھاسیں رنگ ءَ بلوچستان ءِ جوانیں ءُ نرمیں اکس ءَ را ھم پدر کن انت۔ محکمہ بلوچستان دود ءُ ربیدگ ءِ جارکش ءِ رد ءَ اے تر ءُ تاب یک ماہے ءَ برجاہ بیت کہ ایشی ءِ تہا ازمکار جرمنی ءُ ہالینڈ ءِ جتا جتائیں شہراں "نور سور” ءِ پرفارمنس پیش کن انت۔ اے گامگیج ءَ چہ میاں اوستمانی تک ءَ دود ءُ ربیدگی سیادی گیش بنت ءُ بلوچستان ءِ راجی ازم نوکیں پجارے رس ایت۔ سر وزیر بلوچستان میر سرفراز بگٹی ءَ اے گامگیج ساڑاتگ ءُ گشتگ کہ بلوچستان ءِ حکومت ازمکارانی سرپرستی ءُ دود ءُ ربیدگ ءِ دیمروئی ءِ ھاتر ءَ ہر ممکنیں گامگیج کنگ ءَ انت۔ آئی ءَ گوشت کہ اے رنگیں پروگرام نہ ایوک ءَ ازمکار آنی دلبڈی ءَ کن اَنت بلکینگ ءَ سرجمیں دگنیا ءَ پاکستان ءِ جوانیں امیج ءَ را پدر کنگ بیت۔ ڈائریکٹر کلچر داؤد ترین ءِ رد ءَ بلوچستان حکومت ءِ محکمہ کلچر آیوکیں وھد ءَ اے وڑیں کارانی برجم دارگ ءِ ھاترا جزم انت دانکہ صوبہ ءِ باصلاحیتیں ازمکاراں جھان ءِ تک ءَ دیم ءَ آرگ بہ بیت۔