پٹرول ءِ نرخ ءَ را دائمی کنٹرول ءِ تہ ءَ دارگ ءِ واستہ جھان ءِ جیڈھ آنی گیواری سک باز المی اِنت، وفاقی وزیر علی پرویز ملک

اسلام آباد۔26اپریل  (اے پی پی): پٹرولیم ءِ وفاقی وزیر علی پرویز ملک ءَ اے گپ ءِ سر ءَ زور پر دات کہ پٹرول ءِ نرخ ءَ را دائمی کنٹرول ءِ تہ ءَ دارگ ءِ واستہ جھان ءِ جیڈھ آناں گیواری سک باز المی اِنت، پاکستان ءَ ایندھن ءِ سپلائی ایمن اِنت، ایشی ءِ برعکس بھارت ءَ شہری پٹرول پمپ آنی سر ءَ دراجیں صف ءُ کمی ءِ آماچ بوتگ اَنت۔ دمگی ھال رسانکی چینل ءَ گوں تران کنان ءَ علی پرویز ملک ءَ گوشت کہ ایندھن ءِ نرخ مھکم دارگ ءُ مارکیٹ ءَ توازن ءِ برجائی ءِ واستہ کوشست بوھگ ءَ انت۔ آئی ءَ اے گپ ءِ سر ءَ زور پر دات کہ پاکستان ءِ جاور ھال بھارت ءِ وڑیں بازیں ملک آنی چہ نسبت ءَ شرتر اَنت کہ آ جھان ءِ جیڈھ آنی سبب ءَ اقتصادی دباؤ ءِ آماچ اَنت۔ آئی ءَ مزن وزیر، فیلڈ مارشل ءُ نائب مزن وزیر ءِ سروکی ءَ را ساڑات ءُ آوانی فعالیں گامگیج آناں توسیپ کت ءُ توانائی ءِ سلامتی ءُ اقتصادی استحکام ءَ را دل یکیمی کنگ ءِ واستہ آوانی کوشست آناں ستا کرزیں لیک ات۔ وفاقی وزیر ءَ اے گپ ھم پدر کت کہ پاکستان ءِ گوما آئی ایم ایف ءِ گوما یک معاہدے ءِ است انت کہ آئی ءِ سر ءَ عمل کنگ المی انت ءُ ھشدار دات کہ ایشی ءِ سر ءَ عمل نہ کنگ ءِ سبب ءَ ملک ءِ معیشت ءِ سر ءَ مزنیں آسراتی بوت کنت۔ آئی ءَ دل یکیمی ءِ درشان کت کہ ڈیزل ءِ کارمرد ءَ را کم کنگ ءُ پٹرول ءِ نیمگ ءَ شنگ کنگ ءَ ھوار حکمت عملی ءِ تہ ءَ بدلی ءَ چہ ایندھن ءِ دستیابی ءَ را گہتر کنگ ءُ نرخ آنی سر ءَ جوانیں رنگ ءَ کنٹرول کنگ ءَ کمک رستگ۔ یک جُستے ءِ پسو ءَ پٹرولیم ءِ وزیر ءَ اے گپ ءِ سر ءَ زور پر دات کہ پاکستان ملکی تک ءَ تیل یا پٹرول پیداک نہ کنت ءُ وتی توان ءِ لوٹ پیلو کنگ ءِ واستہ سرجمی ءَ درآمد ءِ سر ءَ انحصار کنت۔ آئی ءَ گیش گوشت کہ مھکمیں سپلائی ءَ را دل یکیمی کنگ ءُ نرخ آنی انتظام ءِ واستہ اسٹریٹجک منصوبگ بندی ءُ میاں اوستمانی معاہدہ آنی سر ءَ عمل کنگ لوٹ ایت۔ آئی ءَ گیش ءَ چہ گیش اے گپ ءِ سر ءَ دلگوش گور کت کہ پٹرولیم ءِ چیز آنی نھاد آنی سر ءَ دائمی کنٹرول ءِ سیادی گوں جھان ءِ جیڈھ آناں گیواری ءَ گوں بندوک اِنت ھاسیں رنگ ءَ امریکہ ءُ ایران ءِ نیام ءَ کش ءُ چیل ءِ گوں جھان ءِ تیل ءِ مارکیٹ آنی سر ءَ براہ راست تاوان رسیت۔ وفاقی وزیر ءَ گوشت کہ ایندھن ءِ نرخ آنی تہ ءَ دراجیں مدتی برجائی ءِ واستہ اے وڑیں کش ءُ چیل آنی گیواری ءِ ھوار ایندگر جیو پولیٹیکل جیڈھ آنی گیواری ھم المی اِنت۔ دگہ جُست ءِ پسو ءَ آئی ءَ اوگرا ءِ برجاھیں ڈیجیٹلائزیشن ءِ عمل ءُ پٹرولیم ءِ شوبگ ءَ کارکردگی ءُ شفافیت ءَ را گہتر کنگ ءِ واستہ گیش ڈیریگولیشن ءِ ضلورت ءِ سر ءَ زور پر دات۔ وفاقی وزیر ءَ اے گپ ءِ سر ءَ زور پر دات کہ اے اصلاحات جوانیں حکومت داری ءُ ایندھن ءِ بھر ءُ بانگ ءِ نظام ءَ را کارآمد جوڑ کنگ ءِ واستہ سک باز المی انت۔