پاکستان ءِ فضائیہ چہ وطن ءِ رکھینگ ءِ جوزگ  ءَ پُر اِنت ءُ دژمن ءَ را لائکیں پسو دیگ ءِ ھاترا مدام تیار اِنت

اسلام آباد۔26اپریل  (اے پی پی): وطن ءِ رکھینگ ءِ جوزگ  ءَ چہ پُریں پاک فضائیہ دژمن ءَ را لائکیں پسو دیگ ءِ واستہ مدام تیار انت۔ راستی ءِ جنگ ءَ پاک فضائیہ ءَ ہمت ءُ بہادری ءِ نوکیں راجدپتر جوڑ کت کہ ایشی ءِ ھیبتان سرجمیں دنیا ءَ مار اِت۔ راستی ءِ جنگ ءَ پیسر پاکستان ءِ بالی اُرد ءَ 3 روچی شدیدیں جنگی مشق "زرب حیدری” بندات کتگ۔ اے مشق آنی مول ءُ مراد پاک فضائیہ ءِ آپریشنل تیاری آناں گڈی رنگ دیگ ءُ ھرچ وڑیں ممکنہ بھارتی زوراکی ءِ سر ءَ جوانیں پسو دیگ بوتگ۔ مشق آنی تہ ءَ جے ایف 17 تھنڈر ءُ ایف 16 ءَ ھوار جتا جتائیں جنگی بالی گراب آناں وتی توانائی آنی سرجمی ءَ درشان کتگ۔ بدل بوھوکیں سیکورٹی جاور ھال آنی رد ءَ پاک فضائیہ ءَ آپریشنل فضائیہ اڈہ چالو کتگ اَنت۔ جنگی بالی گراب آنی ایر کنگ ءِ مول ءُ مراد سلاہ بندیں اُرد آناں رسد ءِ کمک دیگ ءُ ہندوستان ءَ را ممکنہ ماجراجویی ءِ سنگینیں آسر آنی بابت ءَ ھال دیگ بوتگ۔ حق ءِ جنگ ءَ پاکستان ءِ بالی فوج ءَ اے گپ ثابت کت کہ آ رافیل ءِ وڑیں ھرچ نوکیں بالی گرابے ءِ ھلاس کنگ ءِ سرجمیں توان ءَ داریت۔ دفاعی ماہرین ءِ رد ءَ پہلگام ءِ دروگیں پرچم ءَ پد پاک فضائیہ ءَ مشق ءُ اسٹریٹجک تاکتیک ءِ وسیلگ ءَ دژمن ءَ را اے گپ پدر کتگ ات کہ پاکستان ءِ فضائی دمگ ءِ دفاع ناقابل تسخیر انت۔ آئی ءَ گوشت کہ حق ءِ جنگ ءِ ساھت ءَ پاک فضائیہ ءَ ھوا ءَ دژمن ءِ جنگی بالی گراب آنی تباہ کنگ ءَ چہ وطن ءِ رکھینگ ءِ راجدپتر ءَ زرین باب ءِ گیش کتگ۔